Уул уурхайн яамны Төрийн захиргааны удирдлагын газрын дарга асан Д.Батболдоос болж татварын байцаагч Ц.Туяа гэгч бүсгүй мэргэжил нэгт Э гэгчийг хэрцгийгээр амь насыг нь хөнөөсөн хэрэг гарсан билээ. Энэ хэргийн шүүх хурал өнөөдөр Баянгол дүүргийн шүүхэд нээлттэй хэлэлцэхээр эхэлсэн ч энэ сарын 11-нийг хүртэл хойшлууллаа.
Шүүх хурал хойшлуулах шалтгаан нь шүүгдэгч Ц.Туяагийн өмгөөлөгч эмнэлэгт хэвтэж байгаа гэх шалтгааныг шүүх бүрэлдэхүүн хүлээн авч ийн хойшлуулсан юм. Шүүх бүрэлдэхүүн шүүх хурлыг хойшлуулах шийдвэр гаргах үед талийгаач Э-ийн ээж шүүгдэгч Ц.Туяа руу цүнхээ шидэж, “Энэ хүүхэн миний охины амийг авсан. Түүнд цаазын ял оноо. Амийг амиар солино, ална” хэмээн орилж, чаралж байв. Харин шүүгдэгчийн өмгөөлөгч, “энэ хувь хүний асуудал учир дараагийн шүүх хурлыг хаалттай хийх хүсэлтэй байна” гэдгээ шүүх бүрэлдэхүүнд хэлж байлаа.
Хэргийн эзэн, хэнгэргийн дохиур гэдэг шиг энэ хэрэг гарах үндэслэл нь болсон гэх Д.Батболд шүүх хуралд гэрчээр оролцохоор ирсэн ч хэвлэлд ярилцлага өгөхгүй хэмээн зугтан одсон юм.