Статистикаас үзвэл Монгол Улс өнгөрсөн онд зургаан тонн алт олборлосон байдаг. Энэ нь 2005 оноос хойш алт олборлолт дөрөв дахин буурсныг илтгэнэ. Үүнийг гэнэтийн ашгийн 68 хувийн татвар, “урт нэртэй” хуультай холбон тайлбарладаг. Уг хууль үйлчилж эхэлснээс хойш Монголбанк 48 тонн алт л худалдан авчээ. Эдүгээ  алтны далд наймааг ил болгоно гээд хууль хүртэл санаачлаад УИХ-аар хэлэлцүүлж байгаа. Одоо мөрдөж байгаа  хуулиар алтны нөөц ашигласны төлбөр тав, өсөн нэмэгдэх роялти таван хувь юм. Алтны худалдаанд ил тод байдал бүрдүүлэх хуулийн төсөлд нөөц ашигласны төл­бөр 2.5, өсөн нэмэгдэх роял­тийн төлбөр 0 хувь байхаар тусгажээ. Мөн уг хуулийг таван жилийн хуга­цаанд тогтвортой мөрдөх аж. Алтны худалдаа ил болсноор өнөөгийн ханшаар бодвол манай улсын гадаад валютын нөөц жилд 1.7-2 тэрбум ам.доллараар нэмэгдэх тооцоо гарчээ. Ингээд ирэх таван жилд манай улсын гадаад валютын нөөц 8.5-10 тэрбум ам.доллар болох нь. Тэгэхээр сүүлийн долоо найман жилд алт олборлолтоо хумиснаар хэдий хэмжээний алдагдал хүлээж байсан нь эндээс тодорхой харагдаж буй юм. Энэ оны эхний найман сарын байдлаар манай улсын олборлосон алт 5.7 тонн давсан мэдээлэл бий. Иймд  оны сүүлч гэхэд өнгөрсөн жилийнхээс давах нь. Өнөөдөр Оюу толгой ордыг тойрсон яриа хэлцэл болж хөрөнгө оруулалт нь түр зогсоод байгаа. Уг орд алт олборлолт нэмэгдэхэд чухал үүрэг гүйцэтгэнэ. Тухайлбал дөрөв, таван жилийн дараа гэхэд Монгол Улс жилд 40 тонн алт олборлодог болно гэдэг. Үүний дийлэнх нь Оюу толгойн алт байх аж.