Нийслэлийн 374 жилийн ойг тэмдэглэн өнгөрүүлэх ажлын хүрээнд Нийслэлийн тээврийн газар, зорчигч тээврийн үйлчилгээ эрхлэгч Аж ахуйн нэгж байгууллагуудтай хамтран нийтийн тээврийн үйлчилгээг сайжруулах, олон нийтэд сурталчлах, мэдээлэл түгээх зорилгоор нээлттэй өдөрлөгийг нэг сарын хугацаанд зохион байгуулж байна. Энэ ажлын хүрээнд нийтийн зорчигч тээврийн үйлчилгээний “Сутайн буянт” ХХК Цамбагарав худалдааны төвийн урд талбайд нээлттэй өдөрлөгөө зохион байгууллаа. Энэхүү нээлттэй өдөрлөгөөр “Замын хөдөлгөөнд соёлтой оролцохын төлөө, Соёлтой үйлчлүүлэхийн төлөө, Түгжрэлгүй байхын төлөө, Хоггүй хотын төлөө, Тасалбараа авдаг байхын төлөө, 1-р эгнээгээр саадгүй зорчихын төлөө” зэрэг нийслэлчүүдийг цаг үргэлж бухимдуулж байдаг олон асуудлуудыг шийдвэрлэхийн төлөө “Нэгдэцгээе” уриалга гаргалаа. Мөн өдөрлөгт хүрэлцэн ирсэн иргэдэд зориулж ажлын байрны бүртгэл явуулж, азтай зорчигч шалгаруулж, өөрсдийн үйл ажиллагааг танилцуулсан бөгөөд зорчигч тээврийн үйлчилгээг хэрхэн сайжруулах, цаашид ямар арга хэмжээ авч ажиллавал зохих, иргэд юу хүсч байгаа талаар нээлттэй ярилцаж, санал асуулга явууллаа гэж Нийслэлийн Тээврийн газраас мэдээллээ.