МАН-ын Гадаад харилцаа хариуцсан Нарийн бичгийн дарга Д.Цогтбаатар, Ерөнхий нарийн бичгийн даргын зөвлөх Г.Тэнгэр нар Лаос Ардын Хувьсгалт Нам /ЛАХН/-ын Төв хорооны урилгаар энэ сарын 6-9-ны өдрүүдэд Бүгд найрамдах Ардчилсан Лаос Ард Улс /БНАЛАУ/-ын Вьентьян хотноо ажлын айлчлал хийлээ. Айлчлалын үеэр БНАЛАУ-ын дэд Ерөнхийлөгч, ЛАХН-ын Төв хорооны Улс төрийн товчооны байнгын гишүүн Бунханг Ворачит-д бараалхаж, ЛАХН-ын Төв хорооны гишүүн, Намын Гадаад харилцааны газрын орлогч дарга, Гадаад харилцааны дэд сайд Сунтон Саяачактай хоёр талын уулзалт хэлэлцээр хийж, уламжлалт харилцаатай хоёр намын хамтын ажиллагааг тасралтгүй идэвхтэй хөгжүүлэх, намын үйл ажиллагааны болон улс орны хөгжлийн талаар харилцан туршлага байнга солилцож байхаар тогтжээ. Мөн Байгалийн баялаг, Байгаль орчны сайд Нулин Синбандит, Эрчим хүч, уул уурхайн дэд сайд Сомбун Расасомбат, Төлөвлөлт, хөрөнгө оруулалтын дэд сайд Бунтави Сисопантонг нартай уулзаж, хоёр орны хамтын ажиллагааг уламжлалт салбаруудад хөгжүүлэхээс гадна уул уурхай, эрчим хүч, хөрөнгө оруулалтын шинэ салбаруудад харилцан мэдээлэл, туршлага, мэргэжилтэн солилцох, Монголын уул уурхайн салбарын түүх, сургамж, туршлагаас зааж сургах, уул уурхайн салбарт Монголын болон гадаадын хөрөнгө оруулалтын татахад хамтран ажиллах тухай ярилцсан байна.