Зам, тээврийн яамны Төрийн нарийн бичгийн дар­га Б.Батзаяа тэргүүтэй  тө­лөө­­лөгчид, Хонконгийн За­саг за­хиргааны онцгой бүсийн Тээвэр, орон сууцны газрын тээврийн асуудал эрхэлсэн нарийн бичгийн дарга хатагтай Кэнди Нип тэр­гүүтэй төлөөлөгчидтэй уулз­сан байна. Талууд агаа­рын харилцааны тухай Монгол Улсын Засгийн газар, Бүгд Найрамдах Хятад Ард Улсын Хонконгийн Засаг Захиргааны Онцгой бүсийн Засгийн газар хоорондын хэлэлцээрийн асууд­лаар хэлэлцээ хийжээ.  

Уг хэлэлцээрийн “Марш­рутын хуваарь”-т өөрчлөлт оруулж, Монголын талаас томилогдсон агаарын тээвэр­лэгчийн нислэг гүйцэтгэх цэгийг Хонконг, дундын болон чанад орших цэгийг БНХАУ-ын болон Тайваны цэгүүдээс бусад чиглэлийг талууд Иргэний нисэхийн удирдах байгууллагууд тусгайлан тогтох аж. Мөн Хонконгийн талаас томилогдсон агаарын тээвэр­лэгчийн нислэг гүйцэт­гэх цэгийг Монгол Улс дахь цэг, дундын болон чанад орших цэгүүдийг  хожим то­дорхойлоход нээлттэй цэгүүд байхаар, нислэг гүйцэтгэх маршрутыг тусгайлан тогтоо­хоор тохи­ров.

Багтаамжийг нислэгийн давтамжаар тохирсныг хэвээр үлдээж, өмнө нь долоо хоногт найман удаа байсныг зорчигч, ачаа хосолсон болон дан ачаа тээврийн нис­лэгийн хэмээн 11 болгон нэмэгдүүллээ.

Аяллын дугаар хамтран эзэмших зохицуулалтыг бүр­­дүүлснээр агаарын тээ­вэр­­лэгчдийн нислэгийн дав­тамж нэмэгдэж, агаарын хөл­гийн суудал ашиглалт сай­жирах юм. Түүнчлэн хоёр талаас томилогдсон агаа­­рын тээвэрлэгчид Мон­гол-Хонконгийн хооронд тө­­­дийгүй өөрийн аяллын ду­гаарыг болон гуравдагч ул­сын агаарын тээвэрлэгчийн аял­лын дугаарыг хуваах зарч­маар гуравдагч улсаас зорчигч тээвэрлэх боломж бүр­дэх гэнэ. Тухайлбал, үндэсний агаарын тээвэрлэгч “МИАТ” ТӨХК нь Хонконгийн төдийгүй Энэтхэг, Сингапур, Австрали зэрэг гуравдагч орны агаарын тээвэрлэгчтэй өөрийн дугаараа хуваах зарчмаар Хонконгоор дам­жуулан тухайн орноос зор­чигч тээвэрлэх өргөн бо­ломж нээж өгч байна.

Энэхүү хэлэлцэн тохи­ролцсон асуудлуудаар хоёр тал харилцан ойлголцлын санамж бичиг байгуулж баталгаажуулжээ.