-УИХ-ын гишүүн Ё.Отгонбаяртай холбоотой яг ямар хэргийг цагдаагийн байгууллага шалгаж байна вэ? Гишүүн өөрөө болохоор ямар ч гэмт хэрэг үйлдээгүй, цагдаа намайг нэг ч удаа дуудаж асуугаагүй гэдэг? Гэсэн сэтгүүлчийн асуултад Хуульзүйн сайд Х.Тэмүүжин “Энэ хэргийг Хуулийн байгууллага хуулийн хүрээнд шалгаж байгаа. УМБГ-ын дарга Г.Батсүхийн сэтгүүлчдэд мэдээлснээр эрхэм гишүүн Ё.Отгонбаярын  бусдаас авлига нэхсэн, түүний эхнэрийн олон данстай холбоотой асуудлыг шалгаж байгаа нь үнэн. Гэхдээ данстай холбоотой асуудал дээр давхар бичилтүүд байгааг, үүнээс болж мөнгөний дүн өөрчлөгдөж болохыг үгүйсгэхгүй. Тиймээс энэ хэргийг шалгаж байгаа хуулийн байгууллага хэргийн талаар нэмэлт тайлбар гаргаж өгөх байх. Өөрийнх нь хэлсэн үгийн тухайд хэрэгт холбогдсон хүн хэзээ ч өөрийгөө “гэм буруутай” гэж хэлдэггүй. Энэ бол хүний Үндсэн хуулиар олгогдсон эрх. Хэн ч байсан өөрийгөө “гэм буруугүй” гэж хэлэх эрхтэй. Тухайн хүн өөрөө болон түүний эхнэр, хүүхэд, аав, ээж нь ч гэсэн түүний эсрэг мэдүүлэг өгөхгүй байх эрхтэй. Тийм л нийгэмд бид амьдарч байгаа.Тиймээс Ё.Отгонбаяр гишүүн өөрийгөө буруугүй гэсний төлөө “энэ хүн буруугүй” гэж туйлширч ойлгож болохгүй” гэсэн хариу өгчээ.