УИХ-ын гишүүн Б.Бат-Эрдэнэ намын даргад өрсөлдөнө гэдгээ өчигдөр албан ёсоор илэрхийлэв.Мэдээж Их хурлын төлөөлөгчид итгэл үзүүлбэл гэж тодотгосон ч “Ерөнхийлөгчид намын даргынхаа урдуур ороод өрсөлдөөд болсон юм чинь одоо намын даргад үзэхэд болохгүй зүйл юу байна” хэмээн эр хүний цээжинд эмээлтэй хазаартай морь багтана гээч болж яваа бололтой.

 Гэвч Ерөнхийлөгчийн сонгуульд түүний ялагдсан шалтгааны хамгийн том нь намын нөхдөөс дэмжлэг авч чадаагүйд байсан гэдгийг хүн бүр толгой дохин хүлээн зөвшөөрсөн санагдана. Харин аварга маань үүнийг олж хараагүй бололтой. Намын дүрмээ зөрчин байж, Намын даргатайгаа өрсөлдөөд Ерөнхийлөгчид нэр дэвших эрх авчихсан учраас намын дарга бараг л болчихсон гэсэн үг хэмээн ёстой л бөх хүний бүдүүн ухаанаар сэтгэж суугаа бололтой. Нэгэнтээ энэ намын нөлөө бүхий фракцын толгой С.Баяр “Улс төр бол урлаг спортоос шал өөр. Намын бодлогоо намаас гаргасан хамтын шийдвэрээ эсэргүүцэж яваа хүнийг бол би үздэггүй. Намынхаа бодлогыг эсэргүүцдэг хүнийг би яаж дэмжих вэ. Дэмжиж байгаа нь гээд намын бодлогоо эсэргүүцэх үү. Хувь хүн өөрийн бодолтой байж болно. Харин намаа төлөөлж төрийн сонгуульд оролцож байгаа бол намынхаа л бодлогыг дагах ёстой. Өөр гарц  байхгүй. Энэ бол улс төрийн тоглоомын дүрэм. Хатуу дүрэм” хэмээн хатуухан хэлсэн удаатай.

Намын лидерүүдээсээ төдийлэн оноо цуглуулж, өөрийгөө улстөрч хэмээн үнэлүүлж, хүлээн зөвшөөрүүлж чадаагүй учраас Ерөнхийлөгчийн сонгуульд түүнд гээд гар сарвайх нэгэн ч олдоогүй гэдэг. Тиймээс ч намынхаа сангийн уутыг доош нь харуулаад гөвчихсөн болохоор өнөөдөр зарим хэвлэл мэдээлэл Б.Бат-Эрдэнэтэй шүүхдэх үү, МАН-ын санхүүтэй шүүхдэх үү дээрээ тулчихсан суугаа гэдгийг хэд хэдэн удаагийн хэвлэлийнхний гаргасан мэдэгдлээс харж болох. Уг нь намын санхүүгээс гэлтгүй халааснаасаа хэвлэлийнхний хэдэн цаасыг гаргаад өгөх бэлтэй л аварга баймаар даа.