МИАТ-ийн экс удирдлагуудыг мөнгө угаасан хэргээр яллан анхан болон давж заалдах шатны шүүхээс Б.Эрдэнэбилэгт 13 жил нэг сар, Б.Бат-Эрдэнэд 12.1 жил, Ц.Орхонд 11 жил, дэд захирал байсан Ч.Хоролсүрэнд 13.1 жил, Ч.Хоролсүрэнгийн дүү, "Монголиан эйрлайнс" группийн захирал асан Ч.Суурьтогтоход 10.1 жил, “Голомт” банкны зургадугаар салбарын захирлаар ажиллаж байсан Г.Саранчимэгт 11 жил нэг сарын хорих ял оноогоод байсан. Гэвч тэдний хувьд оноосон ял нь дэндүү хүнд санагдсан учраас хүн тус бүртээ гурван өмгөөлөгч хөлслөн ажиллуулж, Улсын дээд шүүхэд давж заалдсан.

18 өмгөөлөгчийн ачаар ямартаа ч өчигдөр хуралдсан Дээд шүүхийн шүүх бүрэлдэхүүн тэдний ялыг нь хөнгөрүүлжээ. Мөнгө угаасан гэх хэргийг бүхэлд нь хэрэгсэхгүй болгон бусад зүйл ангиар буюу байгууллагын мөнгө шамшигдуулсан гэсэн үндэслэлээр яллан Б.Эрдэнэбилэгт долоон жил, Ч.Хоролсүрэнд найман жил, Ц.Орхон, Б.Бат-Эрдэнэ, Г.Саранчимэг нарыг тус тус гурван жил хорих ялаар шийтгэв. Харин Ч.Хоролсүрэнгийн дүү, “Монголиан Эйрлайнс” группийн захирал асан Ч.Суурьтогтохын хэргийг хэрэгсэхгүй болгосон байна. Шүүх хурлыг Улсын дээд шүүхийн шүүгч Ж.Нямжав даргалан явуулсан байна.