Монгол Улсын дээд агаарын зайн замуудыг шинэчлэн тогтоож, нислэгийн хөдөлгөөний шинэ загварт шилжүүлэх ажил амжилттай хэрэгжиж дуусчээ. ИНЕГ иргэний нисэхийн салбарт нислэгийн хөдөлгөөний удирдлагын үйлчилгээг олон улсын стандартад нийцүүлэх ажлын хүрээнд  Монгол Улсын дээд агаарын зайн агаарын зам, секторуудын хариуцлагын бүс, давтамжийг шинэчлэх, нислэгийн хөдөл­гөөн удирдлагад аши­глах стрипийн аргачлалын өөрч­лөлтүүдийг Монгол Улсын Зам Тээврийн Сайдын  болон ИНЕГ-ын даргын тушаалын дагуу өчигдөр орон нутгийн цагаар 08.00 цагт нэвтрүүлсэн байна. Монгол Улсын дээд агаарын зайн нислэгийн хөдөлгөөний удирдлагад бодит ажиглалтын системийг өнгөрсөн оны наймдугаар сарын 23-ны өдөр ашиглаж эхэлснээс хойш нэг жилийн дараа дахин хоёр ажиглалтын систем суурилуулж байна. Ингэснээр манай улсын дээд агаарын зайн 75 хувь, нийт нислэгийн 94 хувь, өнгөрөлтийн нислэгийн ачаалал бүхий  агаарын замуудыг бодит ажиглалтын систем ашиглан харж удирдах боломж бүрдэж байгаа аж. Түүнчлэн хамрах зай нэмэгдэхийн сацуу өмнөх ажиглалтын системийн найдвартай ажиллагаа тодорхой хувиар өсөж буй нь нислэгийн аюулгүй байдлын төвшин төдий хэмжээгээр нэмэгдэх боломж аж.  Түүнчлэн энэ салбарт гарсан нэгэн том өөрчлөлт бол нислэгийн хөдөлгөөн удирдлагын стрип аргачлалыг өөрчилсөн явдал юм. Стрип нь нислэгийн хө­дөлгөөн удирдлагад шаард­лагатай мэдээллийг агуул­сан зурвас хэлбэр бү­хий стандарт хэмжээтэй цаас байдаг ба процедур нислэгийн хөдөлгөөн удирд­лага-сонсч удирдахад хам­гийн гол ашигладаг, нислэ­гийн хөдөлгөөний шилжилт хөдөлгөөн, төсөөллийг нис­лэгийн удирдагчид үзүүлэх үүрэг­тэй. Өнөөг хүртэл ашиг­лаж ирсэн статик/процедур удирдлага/ стрип нь илтгэх цэг тус бүрт нэг стриптэй ба нислэгийн агаарын замын дагуу олон стрип байсан бол шинээр динамик/ бодит ажиглалтын удирдлага/ стрипт шилжсэнээр нэг нислэгт нэг стрип ашиглах юм. Ингэснээр нислэгийн удирдагчид бодит ажиглалтын дэлгэц дээр ажиллах хугацааг ихэсгэх, нислэгийн аюулгүй ажиллагаанд тавигдах хяналтыг улам бүр сайжруулахад том дэвшил гарч байгаа юм.