УИХ-ын гишүүн Ж.Батзандангаас зарим зүйлийг тодрууллаа.

-Төрийн өндөр албан тушаалтан оффшор бүсэд данстай байхыг хориглосон таны санаачилсан хуулийн төсөл Байнгын хорооноос хэлэлцэх эсэх дээр дэмжлэг авч чадсангүй?
-Оффшор гэж татвараас нуугддаг бүс. Төрийн өндөр албан тушаалтнуудыг мөнгө байршуулах, хадгалахыг хориглохоор төсөлд оруулсан юм. Харамсалтай нь дэмжсэнгүй. Тэгэхээр төрийн өндөр албан тушаалтнууд маань оффшор бүсдээ мөнгөө хадгалаад, төсвөөс, төрөөс хулгайлснаа гадаадад байршуулаад явахаар болж байх шиг байна. Тэгж мөнгөө байршуулаад сайн сайхан яваарай гэж ерөөе дөө.

-Төрийн алба хашиж байгаа гадаад эхнэр, нөхөртэй хүмүүсийн хувьд ашиг сонирхлын зөрчил хэр байдаг юм бол?
-Орос эхнэрүүдийн үе гэж 1990-ээд оны эхэн хүртэл Монголд байсан. Гадаад эхнэр, нөхөртэй хүмүүс Монголын төрийг удирддаг байсан. Гадаад улс орны нөлөөгөөр Монголын төр ажилладаг байсан. Гадаадын колони шахуу болчихсон үе саяхныг хүртэл байлаа шүү дээ. Одоо орос эхнэрүүдийн үе биш хятад нөхөр, эхнэрүүд, америк нөхрүүдийн үе ирж байх шиг байна. Үүнээс болгоомжлох үүднээс гадаад эхнэр, нөхөртэй тохиолдолд Үндэсний аюулгүй байдлын зөвлөлд мэдэгддэг байх төсөл өргөн барьсан. Харамсалтай нь дэмжсэнгүй. Гадаад эхнэр, нөхөртэйгөө Монголын төр явахаар болж байх шиг байна.

-Гадаад эхнэр, нөхөртэй төрийн өндөр албан тушаалтан хэр олон байдаг вэ?
-Төрийн албаны зөвлөлөөс тодорхой тоог асуух хэрэгтэй байх. Цөөнгүй байгаа. Ер нь, төрийн өндөр албан тушаалд гадаад эхнэр, нөхөртэй хүмүүсийг томилох нь ёс зүйгүй хэрэг гэж ойлгодог. Америк, Канад, Англид гадаад эхнэр, нөхөртэй хүнийг төрийн албан тушаалд томилохдоо заавал Үндэсний аюулгүй байдлын зөвлөлөөс зөвшөөрөл авч байж оруулдаг. Ийм баймаар байна. Монголд ардчилал, эрх чөлөө гэж ярьдаг ч дур зоргоороо авирладаг төртэй болсон. Ардчилал дур зоргоороо авирлахын нэр биш. Ардчилал гэдэг хэмжээ хязгаар, ёс суртахуунтай байхыг хэлнэ.

-Та төслөө аль улс орны хуулиас туршлага судалж боловсруулсан бэ?
-Олон улсын хуулийн төслүүдийг авч үзсэн. ОХУ, ХБНГУ, АНУ, Канад гээд олон улс орны хуулийг судалж боловсруулсан. УИХ дэмжээд ажлын хэсэг байгуулаад явах бололцоотой байсан. Харамсалтай нь, УИХ оффшортоо мөнгөө хийдэг байя, гадаад нөхөр, эхнэртэй хүмүүсээр Монгол төрийг удирдуулъя гэж хүсч байх шиг байна. Одоо хятад, америк эхнэр, нөхөртэй хүмүүс Монголын төрийг удирдаад аваад явна биз дээ. Надад хэлэх үг алга.

-Энэ төслийг хэдэн гишүүн дэмжиж байгаагаа илэрхийлэв?
-Ер нь, олон гишүүн дэмжиж байгаа.  Сая Байнгын хорооны гишүүдийн тал нь дэмжлээ. Тал нь дэмжээгүйгээс төсөл маань уналаа. Монголын төрд эх орноо гэсэн бодолтой гишүүд цөөнгүй байна. Тэр хүмүүст бас баярлаж байна. Эх орноо оффшорт хийчихье гэсэн бодолтой хүмүүс цөөнгүй байгааг хараад гутарлаа.

-Төрийн өндөр албан тушаалтан гэдэгтээ ямар алба хашдаг хүмүүсийг багтаасан юм бэ?
-Төрийн, улс төрийн удирдах албан тушаалтан, төрийн тусгай албаны удирдах албан тушаалтан, төрийн захиргааны  удирдах албан тушаалтнуудыг хамруулж байгаа. Нэг их олон хүн биш. Яг хэдэн хүн байгааг Төрийн албаны зөвлөл нарийвчлан хэлж өгөх байх.