Улаанбаатар хотын хамгийн том Үндэсний цэцэрлэгт хүрээлэнтэй хаяа нийлэн орших "ОЛИМП" хотхонд захиалга авч байна. Та цонхоороо Богд Хан уулаа, Хатан Туул голоо, нийслэл хотынхоо өнгө төрхийг тольдон харах боломжтой. Нийслэл хотын хамгийн цэвэр агаартай бүсэд чанарын өндөр түвшинд баригдсан орон сууцанд айх аюулгүй, амар тайван, сэтгэл хангалуун, тав тухтай, эрүүл энх аж төрөхийг хүсвэл "ОЛИМП" хотхоныг сонгоорой.
Магадгүй уншигч та энэ рекламыг сонсч л байсан байх. Үнэхээр байршил, барилгын хувьд хэн хүний сэтгэлийг булаахаар хотхон нийсэлийн үнэ цэнэтэй газарт сүндэрлэж байгаа билээ.

Гэвч сайн сайхан рекламны цаана саар зүйл нуугдаж байсан бололтой. МХЕГ-т “Олимп” хотхоны иргэдээс "айлуудад чанарын шаардлага хангахгүй ус нийлүүлж байна гэсэн гомдол" иржээ.

Учир нь, тус хотхон нь энэ оны зургадугаар сард цэвэр усны шугамаа хаалгасан гэнэ. Тиймээс оршин суугчдынхаа хэрэглээнд гүний ус ашиглахаар насосоор ус шахдаг болсон гэнэ. Өнөөдрийг хүртэл мэргэжлийн байгууллагууд хяналт шалгалт тавиагүй тул гомдол гаргасан иргэн инженерт нь хандаж, ундны усны шинжилгээний бичгийг нь үзэхийг хүсэхэд “Аварга геопроект” ХХК-ны барилгын зуурмагт ашиглаж болно гэсэн бичиг үзүүлжээ. Ийм бохир ус хэрэглэснээс болж олон айлын нялх хүүхдүүд гэдэсний өвчнөөр өвчилж байгаа тул уг гомдлыг тухайн иргэн гаргасан аж. Гомдлын дагуу дүүргийн Мэргэжлийн хяналтын газраас шалгаж үзэхэд, “Кусацу принт” ХХК  стандартын шаардлагад нийцэхгүй ундны усаар хэрэглэгчдийг  хангаж байсан нь тогтоогдож торгууль ногдуулжээ.

Уг нь тус хотхон 2000 хүүхдийн сургууль, цэцэрлэгийн цогцолбор, ая тухтай орчин гээд тоочоод байвал олон сайхан зүйлтэй ч иргэдийн эрүүл мэндийг уландаа гишгэсэн үйлдэл гаргасан нь даан ч харамсалтай. Ниргэсэн хойно нь хашгирав гэгчээр шаардлагад нийцэхгүй ус олон сараар хэрэглэсэн хэрэглэгчдийн хохирлыг хэн барагдуулах бол.