УИХ-ын чуулганы өнөөдрийн нэгдсэн хуралдаанаар Үндсэн хуулийн цэцийн бүрэн эрхийн хугацаа нь дууссан хоёр гишүүний оронд шинэ гишүүн  томилох асуудал хэлэлцэж шийдвэрлэлээ. Монгол Улсын Дээд шүүхийн Ерөнхий шүүгч Ц.Зоригтын танилцуулснаар Д.Солонго, Ш.Цогтоо нарыг томилох тухай хэлэлцэж УИХ-ын Хуульзүйн байнгын хорооны санал дүгнэлтийг үндэслэн Ш.Цогтоог 84, Д.Солонгыг 87 хувийн саналаар тус тус батламжиллаа. УИХ-ын гишүүд шинээр томилогдохоор нэр дэвшигчдэд хандан, "Сүүлийн үед Үндсэн хуулийн Цэц нь УИХ-аас гарч буй дүгнэлтийг эсэргүүцэх, улстөржсөн шийдвэр гаргадаг, аль нэг намд үйлчилсэн шийдвэр гаргаж байгаа. Тиймээс шинээр томилогдож байгаа гишүүд үүнийг анхаарч, Цэцийн дээр тэнгэр бий гэдэг үгийг санаж, Үндсэн хуулийн манаачийн үүргээ биелүүлж, хуулиан чанд сахин ажиллах ёстой"-г сануулж байлаа.