Монголын Залуучуудын Холбооноос уламжлал болгон зохион байгуулдаг “Тэргүүний залуучууд” харшийн наадам өнгөрсөн оны онцлох шинэ жилүүдийн нэг байлаа. “Тэргүүний залуу” харшийн наадамд улиран өнгөрч буй 2013 оноо амжилт бүтээлээр дүүрэн үдэж, хийсэн бүтээсэн нь орон нутаг, байгууллага, хамт олондоо үнэлэгдсэн, тухайн жил байгууллагынхаа шилдгээр тодорсон салбар салбарын шилдэг 200 гаруй залуус оролцсон. Шилдэг залуучууд нэг дор цугларч танилцаж, харилцан туршлага мэдлэгээ солилцож нэгэн үдшийг хөгжилтэй сайхан өнгөрөөсөн бөгөөд нийгэм улс төр, бизнесийн, урлаг соёлын төлөөлөгчид зочноор уригдан оролцсон юм. Монгол Улсын Ерөнхий сайд Н.Алтанхуяг зочлон ирж хэлсэн үгэндээ “Энэхүү харшийн наадам үнэхээр ач холбогдолтой сайхан үйл ажиллагаа болж байна. Улс эх орныхоо хөгжлийн тулгуур, ирээдүйн сайн сайхныг цогцлоогчид залуус та бүхнээс их зүйл шалтгаална. Салбар салбартаа чин сэтгэлээсээ амжилттай ажиллаарай “ хэмээн онцлон тэмдэглэлээ. Мөн наадмын үеэр уламжлал ёсоор “Тэргүүний залуу-2013” номын нээлт болсон юм.