Залилан хийж  амар хялбар аргаар мөнгжих хэрэг сүүлийн үед гаарч байна. Тухайлбал,  УБ хотын Баянгол дүүргийн  харьяат Хийморьсүрэн овогтой Золбоо гэгч эмэгтэй  Улсын Ерөнхий  Прокурор Д.Дорлигжавын нэрийг барьж өөрийгөө хамаатан  нь гэж танилцуулан  хоёр ч иргэнээс их хэмжээний мөнгө авч залилсан хэрэг гараад байгаа юм.

Х.Золбоо нь залилах явцдаа өөрийгөө “Увс аймгийн Зүүнговь сумын иргэн,  Улсын  Ерөнхий Прокурор Д.Дорлигжавын дүү“ хэмээн  хэлж явсан аж. Түүнчлэн ямар ч ажилд саадгүй зуучилна гэж иргэн Д.Цагаанхүүгээс 5 сая төгрөг, М.Баянжаргалаас 6000 ам.доллар бэлнээр авсан нь илрээд байна. Түүнд мөнгөө өгсөн дээрхи 2 хүн хэсэг хугацааны дараа залилуулсан болохоо мэдэж мөнгөө нэхэхэд эхэндээ тэрбээр  “Буух эзэн, буцах хаягтай бүү санаа зов  гэж байснаа сүүлд нь  “Би 2 сартай жирэмсэн, Та нар мөнгө нэхэж дарамтлаад байхаар миний хүүхэд зулбах гээд байна дахин бүү ярь” гэж хэлээд утсаа авахаа больсон байна.

Хийморьсүрэн овогтой Золбоо гэгч нь энэ мэтээр хичнээн хүнийг залилан мэхлэж хохироосон болох нь одоогоор  тодорхойгүй байгаа бөгөөд түүний энэ үйлдэлд Баянгол дүүргийн цагдаагийн 1 дүгээр хэлтсийн Мөрдөн байцаах тасгийн ахлах мөрдөн байцаагч, цагдаагийн хошууч Б.Онон  Монгол Улсын Эрүүгийн Хуулийн тусгай ангийн 148 дугаар зүйлийн 148.2-т  зааснаар эрүүгийн 201401010040 дугаартай хэрэг үүсгэн шалгаж байгаа тул  энэ  эмэгтэйд залилан мэхлүүлж , хохирсон иргэд ахлах мөрдөн байцаагч Б.Ононтой 93044892 дугаарын утсаар холбоо барьж гомдол хүсэлтээ гаргана уу.

Дээрх байдлаар бусдыг залилан мэхлэж, хохироож байгаа этгээдүүдэд  хууртахгүй,  анхаарал сэрэмжтэй байхыг УЕПГ-аас сэрэмжлүүлж байна.