Төрийн байгуулалтын байнгын хороо өчигдрийн хурлаараа УИХ-ын Дэгийн тухай хуульд өөрчлөлт оруулах төслийг хэлэлцлээ. УИХ-ын гишүүн А.Бакей, Д.Эрдэнэбат, Н.Батцэрэг болон УИХ-ын гишүүн С.Бямбацогт нарын өргөн барьсан Дэгийн тухай хоёр төслийг хамтад нь хэлэлцсэн юм. Хурууны хээгээр гишүүдийн ирцийг бүрдүүлэх, санал өгөх тухай тус төслүүдэд тусгасан ижил төстэй заалт орсон гэж хамт хэлэлцэхээр болсон.  Байнгын хорооны болон нэгдсэн чуулганы хуралдааны ирц бүрдүүлэхэд хурууны хээгээр бүртгэх гэснийг гишүүд дэмжсэн. Харин ирцэнд бүртгүүлсэн дарааллаар асуулт асуух, хэлэх саналыг бүхлээр нь хасах санал гарсан. Байнгын хорооны гишүүд эдгээр саналыг дэмжсэнээр УИХ-ын дэгийн тухай хуулийн төсөлд гишүүдийн ирцийг хурууны хээгээр бүртгэх гэсэн өөрчлөлт л орохоор болов. Анхны хэлэлцүүлэг дэмжлэг авч чуулганы хуралдаанд хэлэлцэхээр тогтсон. Уг өөрчлөлтийн асуудлаас болж оны өмнөхөн МАН-ын бүлэг завсарлага авч, өнгөрсөн хавар өргөн мэдүүлсэн С.Бямбацогт нарын төсөлтэй хамт хэлэлцэх ёстой гэж байсан. Үүнд намын бүлгүүд зөвшилцөлд хүрсэн учир ийнхүү хэлэлцэж эхэллээ. Хуулийн төсөл батлагдсаны дараа гишүүд цахим төхөөрөмжид хурууны хээгээр бүртгүүлж хуралдаа оролцдог болох юм.