Орос Монголын хилийн “Монд” боомтоор 5,6 калибрын гурван хайрцаг сум авч гарах гэж байсан монгол эмэгтэйг оросын хил гаалийнхан саатуулсан байна. Эмэгтэй сум авч яваагаа гаалийн мэдүүлэгтээ дурдаагүй, галт хэрэгсэл хилээр нэвтрүүлэх талаар төрийн байгууллагын ямар нэгэн зөвшөөрөлгүй байсан байна.
Оросын хилчид сумыг шинжилгээнд өгч, эмэгтэйг саатуулан эрүүгийн хэрэг үүсгэн шалгаж эхэлсэн тухай baikal-media.ru сайт мэдээлжээ. Энэ бүхэн нь галт зэвсэг, сум хэрэгслийг Гаалийн холбооны улсуудын хилээр нэвтрүүлэхэд төрийн байгууллагаас авсан тусгай зөвшөөрөлтэй байж, тэр бүхнээ гаалийн мэдүүлэгт тэмдэглэж шалгуулж байх шаардлагыг зөрчсөн гэж Буриадын гаалийн байгууллагын хэвлэлийн алба мэдээлжээ.