Манай урд хөршийн нийслэлийн агаарын бохирдол Дэлхийн эрүүл мэндийн байгууллагаас зөвшөөрсөн хэмжээнээс 25 дахин өндөр хэмжээнд хүрсэн гэдгийг мэргэжилтнүүд хотын иргэдэд анхааруулжээ. Хурц үнэртэй битүү утаан хөшиг Бээжин хотыг бүхэлд нь нөмрөөд байгаа бөгөөд утааны цаанаас олон зуун метрийн өндөр барилгууд ч харагдахаа больсон байна.
Харагдах орчин хязгаарлагдмал болсны улмаас хотын хурдны авто болон төмөр замыг түр хаажээ. Эрх баригчдын зүгээс хүүхэд, настай хүмүүсийг гэрээсээ гарахгүй байхыг уриалаад, ажиллаж байгаа хүмүүс тусгай баг зүүх хэрэгтэйг онцлов. Амьсгалахад маш хэцүү, хүчтэй ханиалгатай гэсэн оноштой хүмүүс олон зуугаараа эмнэлэгт ханджээ. Бээжинд нүүрсээр ажилладаг халаалтын зуух их олон байдгаас ийм утаан мананд хучигдах буюу “смог” буух гэсэн таагүй үзэгдэлтэй тулгардаг.