Нийслэлийн Засаг даргын Сар шинийг угтан авах зарим арга хэмжээний тухай А/09 дугаар захирамжийн дагуу томоохон зах, худалдааны төвүүдийн замын хөдөлгөөний чиглэлд өөрчлөлт оруулах, уулзваруудын нэвтрүүлэх чадварыг нэмэгдүүлэх, зам дагуу байрлалтай худалдааны төвүүд гаднах талбай, автомашины зогсоолд нэмэлт хүн гарган зохицуулалт хийж, түгжрэл саатал үүсгэхгүй байх талаар зохион байгуулалтын ажлууд хийхээр болсон билээ.
Энэ дагуу  “Өгөөмөр” захын зүүн талын чингэлэгтэй талбайг чөлөөлж, шинэ замын трасс гаргах ажил эхэлсэн байна. “Өгөөмөр” захын зүүн хэсэгт байрлаж байгаа 66 чингэлгийг чөлөөлснөөр тус захаас хойшоо Халдварт өвчин судлалын үндэсний төвийн зам руу шууд гарах боломжтой болох юм. Ингэснээр “Нарантуул”, “Өгөөмөр” захын орчим үүсдэг хөдөлгөөний нягтрал 10 орчим хувиар буурна гэж үзэж байна. Энэхүү ажлыг хэрэгжүүлэхэд тус захын удирдлагууд хамтран ажиллаж, чингэлгүүдийг нүүлгэн шилжүүлэх, талбай чөлөөлөх цэвэрлэх ажилд дэмжлэг үзүүлжээ.