Терроризмтой холбоотой гэмт хэрэг өдүүлсэн хэргээр Иракт 26 хүнд цаазаар авах ял оноосныг дүүжлэн гүйцэтгэжээ. Иракын Хуульзүйн сайд Хасан-аш-Шаммари энэ тухайд “Иракын ард түмний эсрэг харгис алан хядлага, террорист үйлдэл хийсний нь төлөө буруутай гэж үзсэн” гэсэн байна. Телевизийн NBS суваг энэ талаар мэдээлэхдээ иракын хууль сахиулагчид гэмт хэргийг нь сайн мөрдөн шалгаж, баримтаар нотлохын төлөө ажиллаагүй гэж хүний эрхийг хамгаалагчид хэлснийг бас дамжуулжээ.
НҮБ-ын ерөнхий нарийн бичгийн дарга Бан Ги Мун үүнээс өмнө Багдадад айлчлахдаа цаазаар авах ялыг хориглохыг иракын эрх баригчдад уриалсан ч Иракын Ерөнхий сайд Нури аль-Малик татгалзсан хариу өгч байсан юм.
Барууны хэвлэлүүдийн бичиж байгаагаар бол 2013 онд Иракт нийтдээ 169 хүнийг цаазалсан байна. Энэ бол 2003 онд тус улсад олон улсын эвслийн цэрэг орсноос хойш  нэг жилд цаазалсан хамгийн олон хүн гэдгийг хэвлэлүүд тэмдэглэжээ.
Иракт лалын шашны хоёр урсгал болох шиитүүд, суннитуудын хоорондох сөргөлдөөн газар авсан хэвээр байгаа юм. Хамгийн харамсалтай нь энэ сөргөлдөөний хөлд энгийн номхон ард иргэд өртсөөр байна. Зөвхөн өнгөрсөн онд гэхэд л зэвсэгт мөргөлдөөн, халдлага дайралтын үеэр 8000 орчим хүн амь үрэгдсэн гэж НҮБ тооцжээ.