Өвлийн олимп болох Сочи хотын эрх баригчид өнгөрсөн оны дөрөвдүгээр сард тус хотын бүх золбин нохойг устгах тендер зарлаж 1,7 сая рубль төлөвлөсөн нь бөөн дуулиан болсон. Олон нийт, амьтан хамгаалагчид хүчтэй эсэргүүцсэнээс энэ тендерт оролцохыг хүсэгч олдохгүй тендерээ зогсооход хүрсэн юм. Тэд бараг хоёр сая рублиэр нохдыг алахын оронд нохдын байр барьж олимп дуустал байлгахад хангалттай хүрнэ шүү дээ гэж хүртэл бичиж байлаа. Намар нь “Оросын цэргийн нисэх хүчний алба”-наас тендерийг болиулж Ростов-на-Доны “Бася” компани золбин нохойгүй болгох ажлыг хариуцна гэж мэдэгдсэн байна.
Ингээд хөөрхий нохдыг хороож устгах биш өөр тийш зөөвөрлөж олимпын зочдын тав тухыг хангахаар болжээ. Буудуулах аюулаас аврагдсан эхний хэсэг нохойг өнгөрсөн амралтын өдрөөр Москвад авчирчээ. Зохион байгуулагчдын хэлж байгаагаар бол эхний ээлжинд нохдыг сайн дурынхан асарч байгаад  дараа нь сайн санаад хүмүүст дамжуулж өгөх юм байна.