Украины эрх баригчид нийслэл Киевт болж байгаа “Евромайдан” жагсаалыг цэвэрлэх төлөвлөгөө боловсруулаад байна хэмээн Үндэсний аюулгүй байдал, батлан хамгаалах зөвлөлийн эх сурвалжийг үндэслэн “Украины долоо хоногийн толь” сайт мэдээллээ.

“Эх сурвалжийн мэдээлснээр энэ ажиллагаанд  дотоодын цэргийн 4631 албан хаагч, цагдаагийн 1460 ажилтан, тусгай тасгийн “Беркут”-ын 1530 дайчныг оруулахаар бэлтгэж байна. Ингэснээр юун түрүү Грушевийн гудамж болон Европын талбайг бүрэн хяналтдаа авах бол цаашлаад Евромайданыг бүрэн цэвэрлэх юм байна. Үүнээс гадна Үйлдвэрчний эвлэлүүдийн ордноос Майданыг бүрэн цэвэрлэж гаргах, ер нь эсэргүүцэгчдийг бүрэн дарж авах гэнэ” хэмээн мэдээлэлд дурджээ.

Харин цэвэрлэх энэ ажиллагаа хэзээ эхлэхийг дурдаагүй байна.
Энэ сарын 19-нөөс Киевийн төвд Грушевийн гудамжинд жагсагчид эсэргүүцлийн хөдөлгөөнөө идэвхжүүлэн жагсагчид, цагдаагийнхан, тусгай тасгийнхны хооронд мөргөлдөөн болж хоёр талаас олон зуун хүн бэртэж гэмтээд байгаа юм.