Facebook компанийн Үйл ажиллагаа хариуцсан захирал Шерил Сэндберг тэрбумтан болжээ. Facebook-ийн хувьцаа өнгөрсөн мягмар гаригт өсч 58 ам.долларт хүрснээр Ш.Сэндбергийн хөрөнгө тэрбум давсан байна. Тэрээр компанийнхаа 12,3 сая хувьцааг эзэмшдэг бөгөөд 2013 оноос хойш зөвхөн хувьцаанаасаа 300 сая ам.доллар олжээ. Дэлхийн хамгийн хүчирхэг эмэгтэйчүүдийн нэг хэмээн хүлээн зөвшөөрөгдөөд буй Шерил ийнхүү 44 насандаа тэрбумтан болсноор өөрийн хүчээр тэрбумтны зиндаанд хүрсэн залуу баячуудын нэг болж байна. Тэрээр Facebook-т ирэхээс өмнө “Google” компанид ажиллаж байсан юм. Facebook-ээс гадна “Starbucks”, “Walt Disney” компанийн ТУЗ-д багтдаг тэрээр эмэгтэй хүн хэрхэн карьераа өсгөж амжилтад хүрч болох тухай “Lean In” хэмээх ном бичсэн нь өндөр борлуулалттай яваа юм.
Шерил Сэндбергээс өмнө Facebook-ийг үндэслэн байгуулахад оролцсон хэд хэдэн захирал нь тэрбумтан болсон билээ.