МАН-аас Сэлэнгэ аймагт нэр дэвшиж УИХ-ын гишүүн болсон Ж.Эрдэнэбат гэж нэг хүн байдаг юм байна. Энэ хүн ТВ-5 телевизийн “Монгол Улсаа хөгжүүлье” гэдэг нэвтрүүлэгт орж байна аа.

Энэ хүнийхээр бол 1921 оны Ардын хувьсгалаас өмнө Монгол Улс, монгол орон гэж байгаагүй бололтой. Тэрээр “1911 оны хувьсгалаар Монгол Улс тусгаар тогтносон гэж яриад байдаг. Энэ бол хувьсгал биш зүгээр л хөдөлгөөн. Тэгээд ч 1915 оны гэрээгээр байхгүй болсон зүйл. Харин 1921 оны Ардын хувьсгалаар л жинхэнэ тусгаар тогтнолоо олсон” гэж ярьж сууна.
90 гаруй жилийн түүхтэй МАН-ын гишүүн, ардын хувьсгалын өлгий Сэлэнгэ аймгийн уугуул, энэ аймгийн Засаг даргаар ажиллаж байсан энэ хүн 1921 оны хувьсгалаас өмнө монгол орон гэж байгаагүй гээд л бараг хэлчихсэнгүй.
Манж Чин улсын дарлалд 200 гаруй жил болж энэ их гүрний алслагдсан хязгаар, мал бэлтгэлийн бааз байсан монгол орон 1911 оны үндэсний эрх чөлөөний хувьсгалаар тусгаар тогтнолоо олж туурга тусгаар Монгол Улсаа байгуулсныг энэ хүн мэдэхгүй байна уу, мэдэн будилж зориуд ингэж доош нь хийв үү гэдэг нь сонин.
Манжийн төрөөс томилдог дөрвөн аймаг, Дөрвөд Урианхайн хязгаарын ноёдоос өөр улсын хэргийг эрхлэх өөрийн засаг төргүй, нийслэл хүрээ, Улиастайд сууж байсан манжийн амбан бүхий л хэргийг мэдэж  байсан Монгол 1911 оны хувьсгалын дараагаар 1911 оны арванхоёрдугаар сарын 29-ний өдөр шарын шашны тэргүүн Жавзандамба хутагтыг улсын хаанд өргөмжлөн, таван яам бүхий Монгол Улсын Засгийн газраа байгуулсныг Ж.Эрдэнэбат гишүүн мэдэхгүй байна уу, энэ хүний харьяалдаг МАН өнөө хүртэл  ингэж үзсээр байна уу.
Хэдийгээр МАН-ынхан яг энэ Ж.Эрдэнэбат гэдэг хүн шиг 1921 оны хувьсгалаас өмнө Монгол Улс гэж байгаагүй манай МАН л халцгай газар дээр шинэ монгол улсыг байгуулсан гэдэг ч 1921 он хүртэл Богд хаант Монгол улс туурга тусгаар улсынхаа хувьд гадаад орнуудтай харилцах улс орныхоо эдийн засаг, соёл боловсролыг хөгжүүлэх талаар багагүй ажил хийсэн гэдгийг түүх гэрчилнэ. Энэ нь ч 1921 онд байгуулагдсан ардын Засгийн газрын улс орноо хөгжүүлэхээр хийсэн ажилд ихээхэн дөхөм болсон нь үнэн.
Сайн ноён Т.Намнансүрэн тэргүүтэй Монгол Улсын Засгийн газар өөрийн гэсэн цэрэг армитай болж, улсын хэмжээнд өчнөөн олон сургууль, нийслэл Хүрээнд орос сургууль, цахилгаан утасны хороо, цахилгаан станц байгуулсныг МАН-ынхнаас өөр хэн үгүйсгэх юм.
Энэ хүний хэлээд байгаа 1915 оны гэрээгээр, бүр сүүлд 1924 оны тавдугаар сард Караханы гэрээ гэгчээр гадаад монголыг хятадын салшгүй бүрэлдхүүн гэж Орос Хятад хоёр улс үзсээр байсан ч  Монгол Улс байсаар л байсан. Яг нарийндаа 1924 оны энэ гэрээг 1945 онд залруулж ард нийтийн санал асуулгаар БНМАУ жинхэнэ тусгаар улс болон тогтносныг энэ хүн мэдэхгүй л дээ. Бидний ахан дүү хэмээдэг ЗХУ ч 1946 оноос л манайд суугаа бүрэн эрхт төлөөлөгчөө Элчин сайд хэмээн нэрийддэг болсон нь нэг л юм хэлээд байгаа хэрэг.
Ж.Эрдэнэбат гишүүн бас “Сангийн яамны 100 жилийн ой гэж 2011 онд тэмдэглэснийг ойлгохгүй байгаа юм” гэж сууна. Манжийн дарлалаас салж тусгаар улс болоод анх байгуулсан таван яамны нэг нь Сангийн яам байсныг энэ хүн мэддэггүй бололтой.
Монгол орныг гамин, барон гээд харийн түрэмгийлэгч эзлээд байхад ч Монгол Улс байсаар байсан, Монгол улсын төр засаг байж л байсан. 1921 оны ардын хувьсгалаар тусгаар улсаасаа гадаадын түрэмгийлэгчдийг эх орноосоо хөөн зайлуулсан нь ч үнэн баймаар.
Монгол Улсын томоохон нам, нэгэн аймгийн ард иргэдийг төлөөлөн хууль тогтоох дээд байгууллагад сууж, улстөрч болохоор оролдож, өөрийгөө улстөрч хэмээн цээжээ дэлдэн  яваа энэ эрхэм туурга тусгаар Монгол Улсын түүхийг үнэхээр мэддэггүй хүн үү, эсвэл өөрийн намын журмын нөхөр Д.Сарангэрэлийн телевизийн эфирийг ашиглан худал суртал нэвтрүүлж олон түмний толгойг эргүүлэх гэж байна уу. Нэг бол  МАН гэдэг улс төрийн том хүчин өнөө болтол Монгол Улсын түүхийг ийм байдлаар ойлгож түүнийгээ бодлого болгон сурталддаг хэрэг үү.
Энэ МАН, эрхэм Ж.Эрдэнэбат залуудаа “Богд хаан бол тэмбүү яртай, сохор төвд. 1921 оны хувьсгалаас өмнө монгол улс гэж байгаагүй, бөөсөндөө баригдаж өвчинд нэрвэгдсэн хэдхэн хүн л байсан” гэж сурталдаж, ярьж байсан нь үнэн л дээ. Гэхдээ коммунист худал суртлын үе өнгөрөөд 20 гаруй жил болж байхад энэ хүн эрхбиш ном судар уншиж тэнэг төөрөлдлөөсөө салаагүй байгаа нь даан ч харамсалтай.
Ёстой л “Өөх идэвч өөрийншдөггүй, мах идэвч манайшдаггүй” гэдэг зүйр үг шиг  ардчилсан хувьсгалын буянаар хүн бүхэн түүхийн үнэнийг  мэдэхтэй болж байхад энэ хүн ингэж хоцрогдож, тэнэгээ гайхуулж суух ч гэж дээ. Ганцхан зуун жилийн өмнөхийг ингэж ярьж байгаа хүн Чингис хаан, Их Монгол гүрний тухай юу гэж “галлах” бол.
Намынхаа даалгавраар, хуучны хэдэн хашрынхаа даалгавраар монгол төрийн бодлого үйл ажиллагаа бүхнийг үгүйсгэжэ, чагт садаа болж, аль болохоор улс орныг хөгжүүлэхгүйн төлөө дэмийрдгийг чинь хэн бүхэн мэднэ. Гэхдээ түүхийг бол ингэж сөргөн гутааж болохгүй л дээ. Энэ түүхийг чинь та нарын харахаараа нүд нь хорсоод байдаг Н.Алтанхуягийн Засгийн газар, ардчилсан хүчин зохиосон юм биш. Монголын үе үеийн ард түмэн бүтээсэн юм шүү дээ. Аливааг гуйвуулж, улс төр хийж болно, гэхдээ түүхийг гуйвуулж улс төр хийх нь ямар юм бол......
Хөөрхийг хөдөөнөөс ирсэн юм болохоор нь МАН-ын томцуул “ингэж хэл” гээд зааж өгөөд явуулчихсан ч байж мэдэх.
Гэхдээ л Ж.Эрдэнэбат гишүүн ээ, жаахан юм унш.....коммунист суртлаасаа салж үз. Төрийн шагналт доктор О.Батсайхан, Ж.Болдбаатар нартай уулз. Хүн юм мэдэх гээд явж байхад шоолох хүн гарахгүй дээ.