Францын ерөнхийлөгч Франсуа Олланд өөрийн хамтран амьдрагч- эхнэр Валери Триевейлерээс албан ёсоор харилцаагаа тасалж байгаагаа мэдэгдлээ хэмээн Би-би-си дамжууллаа.
Олландын сонгуулийн кампанийн удирдагчдын нэг Валери Триевейлер сонгуулийн дараа улсын тэргүүн хатагтайн үүргийг өөртөө авъя гэж зөвшөөрсөн ч тэд гэр бүлээ  албан ёсоор бүртгүүлээгүй юм.
Энэ оны эхээр францын ерөнхийлөгчийг жүжигчин Жюли Гайтей учир ургуулсан мэдээлэл тархаж эхлэхэд Триевейлер долоо хоногийн эмчилгээ хийлгэхээр шууд эмнэлэгт хэвтсэн юм. Жүжигчин бүсгүй мэдээллийг няцаан шүүхэд өгсөн бол Ерөнхийлөгч хоёрдугаар сард АНУ-д хийх айлчлал хүртлээ гэр бүлээ хэвээр байлгана гэсэн юм.
Ерөнхийлөгч Олландын гэр бүл дэх энэ дуулиан нь тэртэй тэргүй олон нийтийн шүүмжлэлийн бай болоод байгаа Социалист нам то цохилт болно гэж шинжээчид үзэж байна.