Үймээн самуунтай газар явж байгаад хэт даврагсдад барьцаалагдсан хүмүүсийн төлөө их хэмжээний мөнгө төлөхгүй байхыг НҮБ-ын Аюулгүйн зөвлөлөөс улс орнуудад хандан анхаарууллаа. Энэ талаар Аюулгүйн зөвлөлөөс тогтоол гаргаж,  улс орнуудад шахалт үзүүлж эхлээд байна. Барьцаалагдсан хүмүүсийн төлөө мөнгө төлөх нь хэт даврагсад, алан хядах бүлэглэлүүдийн мөнгө олж, үйл ажиллагаагаа санхүүжүүлэх гол арга зам болоод байгаа учир террористуудыг дэмжье гээгүй бол барьцааны мөнгө өгөхгүй байх хэрэгтэй гэж НҮБ анхааруулж байгаа юм.  НҮБ-ын тооцоогоор Аль-Кайда бүлэглэлийнхэн өнгөрсөн гурван жил хагасын хугацаанд ийм замаар 105 сая ам.доллар олсон байна.
Сүүлийн үед Йемен, Сири, Нигер зэрэг дайн дажинтай байгаа орнуудад гадаадын иргэдийг барьцаалж, Засгийн газраас нь мөнгө нэхэх явдал гарч байгаа юм. Гурван жилийн өмнө Нигерт барьцаалагдсан Францын дөрвөн иргэнийг өнгөрсөн аравдугаар сард суллахын тулд тус улсын Засгийн газраас 20 сая евро төлсөн гэдэг мэдээлэл байгаа. Гэхдээ Засгийн газар мөнгө төлсөн гэдгийг үгүйсгэж байгаа юм.