Биеэ үнэлэх нь Хятадад хууль бус явдалд тооцогддог. Гэвч Хятадад үйл ажиллагаа явуулж буй барууны томоохон сүлжээ зочид буудлуудад бие даасан хэлбэрээр үйл ажиллагаа явуулдаг биеэ үнэлэгчдийн саун спа олноороо байдгийг BBC агентлаг илрүүлжээ. Жишээлбэл, Европын хамгийн хуучны, тансаг зочид буудлын сүлжээ болох Кемпинскигийн Чиндао дахь нэг зочид буудалд нь нэг жижиг өрөөнд 10 гаруй бүсгүйг нууцаар байлгаж, биеийг нь үнэлүүлж байжээ. Дэлхий даяар таван одтой 70 гаруй зочид буудалтай, Швейцарьт төвтэй Кемпински тэдний үйл ажиллагааг спа нэрээр халхалж, үйлчлүүлэгчиддээ санал болгодог байна. Тэднээр үйлчлүүлсэн хүмүүс төлбөрөө зочид буудалд төлж байгаа нь биеэ үнэлэх явдал тус буудлын нэгэн төрлийн үйлчилгээ болж таарна гэсэн үг. Биеэ үнэлэгчдийн нэгтэй нь ярилцахад тэд өдөрт дунджаар гурван үйлчлүүлэгчтэй байдаг, орлогынхоо 40 хувийг авдаг гэжээ.

Үүн шиг үйлчилгээ Интерконтинентал зочид буудалд ч байгааг илрүүлсэн байна. BBC-гийн сурвалжлагч Жензоу дахь Рамада Плаза зочид буудалд ч ийм үйлчилгээ байгаа эсэхийг шалгаж үзэхэд мөн л спа нэрээр эрэгтэй үйлчлүүлэгчдэдээ биеэ үнэлэгчдийг санал болгосон байна. 20 гаруй бүсгүйчүүдээс санал болгосон тус буудалд нэг эмэгтэйтэй учрахад 800 юанийн төлбөр төлөх ёстой гэнэ.
Гэвч дээрх зочид буудлууд бүгд энэ мэдээллийг няцааж, спа, массажны үйлчилгээг гуравдагч этгээд үзүүлдэг хэмээн мэдэгджээ.
Хэдийгээр Хятадын эрх баригчид биеэ үнэлэх явдлыг үгүй болгосон гэлцдэг ч одоо тус улсад дөрвөн сая орчин биеэ үнэлэгч бий гэсэн албан бус тоо байдаг. Саун массаж, караоке баарнаас эхлээд үсчний салон хүртэл биеэ үнэлэгчдийн үүр уурхай болдог байна.