Японы Окаяма дахь Сайдайжигийн сүмд 9000 нүцгэн эр оролцсон томоохон баяр болжээ. Энэ бол жил бүр уламжлал болгон зохион байгуулдаг Хадака Мацүри буюу нүцгэн фестиваль нэрээрээ танил болсон баяр юм. Сүмогийн өмсгөл өмсч, хүйтэн усанд орж бие сэтгэлээ ариусгасан эрчүүд сүмд орж, тэдний дунд шидэж өгсөн хос саваа модыг бие биеэсээ өрсөн авахаар тэмцэлддэг байна. Шинги гэж нэрлэдэг энэ ариун саваа модыг авсан хүнийг жилийн турш аз хийморь ивээж явдаг гэлцдэг тул эрчүүд модыг өөрийн болгохын тулд хүч бяраа сорьдог ажээ.