“Сочи 2014” XXII цагаан олимпийн наадамд Монгол Улсаа төлөөлөн оролцсон баг тамирчдыг даваа гарагт Сочи хотын Кубанийн “Хасаг”-ийн 10 дугаар сургуулийнхан хүлээн авч хүндэтгэл үзүүллээ.

Манай баг тамирчдын тэмцээн уралдаан дууссан ч олимпийн хаалтын ёслолын ажиллагаанд оролцоод эх орондоо ирэх юм. Уламжлал ёсоор зочдоо талх, давс барин угтсан сургуулийн хүүхдүүд манай тамирчдад Кубанийн “Хасаг”-ийн ёс заншил, уламжлалтай танилцуулж, сургуулиа үзүүлж сонирхууллаа.

Сочигийн 10 дугаар дунд сургууль Монгол Улстай өнгөрсөн жилээс харилцаа холбоо тогтоосон бөгөөд олимпийн наадмын үеэр манай багийг дэмжсэн байна. Монголын тамирчид гарын үсгээ дурсган, ярилцлага өгч Монгол Улсаа таниулан сурталчилжээ. Өнөөдөр манай тамирчид 10 дугаар сургуулийн төлөөлөгчдийг Олимпийн тосгонд урьж, танилцах аялал зохион байгуулж байгаа аж. Мөн тус сургуулийн төлөөлөгчдийг ирэх зун Монгол оронд айлчлуулахаар болжээ.