Украины Ерөнхий сайд асан Юлия Тимошенко өчигдөр орой хорих эмнэлгээс суллагдмагцаа Киевийн тусгаар тогтнолын талбайд хүрэлцэн ирж, жагсагчдын өмнө үг хэллээ. Нурууны гэмтлийн улмаас тэргэнцэр дээр суугаагаараа тайзан дээр гарч ирсэн ядруу биетэй Юлия Тимошенкогоос урьдын гял цял оргисон дэгжин эмэгтэйн дүр төрх бараг үлдээгүй мэт харагдаж байв. Гэхдээ тэрээр урьд хувьсгал хийж явсан гал цогтой үеийг сануулах мэт хурц ширүүн үгнүүдийг эрх мэдлээсээ дөнгөж унаад байгаа экс эрх баригчдад хаяглаж,  мөн улс орноо тэдний эрхшээлээс гаргаж чадсан жагсагчдыг магтаан сайшааж үг хэлжээ. Тэрээр жагсагчдын жинхэнэ баатрууд хэмээн нэрлээд "Украйнд нүүрлээд байсан хорт хавдрыг авч хаяж чадсан учраас та бүхэн засгийн эрхийг авах бүрэн эрхтэй. Ямар ч улстөрчийн хийж чадаагүйг та бүхэн чадсан. Энэ бол жинхэнэ ялалт" хэмээн мэдэгджээ. Тэрээр мөн үймээнийг намжаах энхийн гэрээ байгуулсны дараа нийслэлээс зугтсан Ерөнхийлөгч В.Януковичийг Тусгаар тогтнолын талбайд, ард түмний өмнө авчрах хэрэгтэй хэмээн жагсагчдад уриалжээ.
Жагсагчдын өмнө үг хэлж байхдаа хоолой нь зангирч, нулимс дуслуулж байсан Ю.Тимошенког харсан жагсагчдын дийлэнх нь түүнийг өрөвдөн, уйлж байжээ.