Америкт өнгөрсөн долоо хоногт нэгэн өвөрмөц гэж болохоор хууль батлагдлаа. Шинэ хуулийн дагуу АНУ-ын Батлан хамгаалах яам зөвхөн өөрийн нутагт үйлд­вэрлэсэн төрийн далбааг өөрийн хэрэгцээнд зориулан худал­дан авч байхаар болжээ. Ингэснээр Батлан хам­гаалахын ханган нийлүүлэгч компаниудыг Хятадаас хямд үнээр төрийн далбаа худалдан авдаг явдлыг таслан зогсоох аж. Төрийн дал­баа л бол далбаа. Хаа­на үйлдвэрлэгдсэн, ямар үнэтэй нь хамаагүй гэж санагдаж болох.
Гэтэл есдүгээр сарын 11-ний алан хядах ажиллагаанаас хойш америкчуудын эх оронч үзэл эрс нэмэгдсэн. Үүнийг дагаад төрийн далбааны эрэлт ч огцом өссөн юм.

Америкийн төрийн далбааны гол худалдан авагч нь Батлан хамгаалах яам болж хувирсан нь ойлгомжтой. Өмнө нь америкчууд төрийн далбаагаа уламжлал ёсоор зөвхөн өөрийн нутагт үйлд­вэрлэдэг байсан. Харин  эрэлт эрс өссөнтэй холбоотойгоор маш хямд үнээр Хятадад за­хиалан хийлгэх замаар ихээ­хэн мөнгө хэмнэж багагүй ашигтай ажиллах боломж армийн ханган нийлүүлэгчдэд гарсныг тэд ч алдалгүй ашигласан нь ойлгомжтой.

Иракаас эхлээд Афганис­тан хүртэл байлдааны ажил­лагаа явуулж америк цэрэг болгон мэдээж эх орныхоо эрх ашгийг хамгаалж бай­гаа. Ийм байтал эх оронч үзлийн бэлгэ тэмдэг болсон төрийн далбааг нь хэн нэгэн бизнесмэн тун удахгүй Дэлхийн тавцанд эдийн зас­­гийн төдийгүй цэргийн гол өрсөлдөгч нь болох гэж байгаа Хятадад хямд хийл­гээд, нутагтаа үнэ нэ­мэн дамлан зарж буй нь байж боломгүй зүйл гэж Аме­­­­­­рикийн хууль тогтоогчид үзжээ.

Анх 2013 оны төсвийг батлах үед энэ тухай дурдаад өнгөрч байсан ч хангалтгүй гэж үзээд арми зөвхөн өөрийн нутагт үйлдвэрлэсэн төрийн далбааг худалдан авахыг заасан шинэ хууль болгон тусад нь баталсан байна. Энэ хууль хоёрдугаар сарын 21-нээс хүчин төгөлдөр болж хэрэгжиж эхэлсэн.
Үүнээс өмнө бүр 1941 онд батлагдсан “Берригийн өөрчлөлт” нэртэй хуулиар АНУ-ын Батлан хамгаалах яам нь зөвхөн онцгой тохиолдолд л өөр улсын нутагт үйлдвэрлэсэн цэргийн хувцас, ган, эд хэрэгсэл, хүнс зэргийг худалдан авах боломжтой байж.