Украины парламент-Дээд Рада ерөнхийлөгч асан Виктор Янукович болон бусад албаны хүмүүст хариуцлага тооцох асуудлаар Гаага дахь Олон улсын шүүхэд хандсан шийдвэрийг эхний хэлэлцүүлгээр нь баталлаа. Энд “2013 оны арваннэгдүгээр сарын 30-наас 2014 оны хоёрдугаар сарын 22-ныг хүртэл энгийн иргэдийн эсэргүүцлийн жагсаалын үеэр хүн төрөлхтний эсрэг гэмт хэрэг өдүүлсэн учраас мөрдөн шалгах”-ыг хүссэн байна. Энэ тогтоолын төлөө нийт 339 депутат гараа өргөжээ. Депутатууд бас Украины Ерөнхий прокурор асан Виктор Пшонко болон ДЯЯ-ын сайд асан Виталий Захарченко нарт хариуцлага тооцох ёстой гэсэн байна. Энэ тогтоолд гурван сарын хугацаанд хууль сахиулах байгууллагууд дээрх албан тушаалтнуудын шийдвэрээр энгийн иргэд рүү галт зэвсэг хэрэглэсний улмаас 100 гаруй хүн амь үрэгдэж ойролцоогоор 2000 хүн бэртэж шархадсанаас 500 орчим нь хүнд байгааг дурджээ. Мөн гудамжинд хасах 15 градус хүйтэн байхад жагсагчид руу усаар шүршиж байсан нь олон хүний эрүүл мэндэд нөлөөлснийг ч дурдсан байна. Хүмүүсийг хулгайлж сураггүй алга болгосон, олон хотод олон хүнийг үндэслэлгүйгээр шоронд хорьж зодож, өмч хөрөнгийг нь хураан үгүй хийсэн гэдгийг ч оруулжээ.