Одоогоос яг гурван жилийн өмнө буюу 2011 оны гуравдугаар сарын 11-нд Японд болсон аймшигт газар хөдлөлт, цунамийн гамшигт өртөж, сураггүй алга болсон эхнэрээ Ясүо Такамацү одоо хүртэл хайсаар байна. Түүний эхнэр Такамүцү бол тэр цунамид өртөн сураггүй алга болсон хэмээн бүртгэгдсэн 2636 хүний нэг юм.
Гамшиг осол болсноос хойш аль хэдийнэ гурван жил өнгөрсөн учраас эхнэрээ амьд мэнд олохгүй нь мэдээжийн хэрэг боловч, цогцсыг нь олж, хүн ёсоор хөдөөлүүлэхийг нөхөр нь хүсч байгаа аж.

Ясүо гамшиг болдог өдөр гэрээсээ хол эмнэлэгт хэвтэж байсан учир эсэн мэнд үлджээ. Харин банкинд ажилладаг түүний эхнэр газар хөдлөх үеэр ажил дээрээ байж таарсан бөгөөд ажлынхантайгаа хамт байшингийнхаа дээвэр дээр гарч, цунами, үерийн аюулаас аврагдах гэж хичээсэн байна. Энэ үедээ тэрээр нөхөртөө "Гэртээ л харимаар байна" гэсэн мессэж бичжээ. Гэвч үүнээс төд удалгүй цунамийн хүчтэй давалгаа түүнийг нөмрөн авч, эмэгтэй их устай хамт хаачсан нь мэдэгдэхгүй сураггүй алга болж. Сүүлд нь түүний гар утсыг олоход "Аварга том цунами" гэж бичээд нөхөртөө явуулж амжаагүй мессэж хадгалагдан үлдсэн байж.

Олон жил ханилсан эхнэрээ энэ аймшигт явдлаар алдсан Такамацү хайж болох бүхий л газраар эцэж цуцталаа яваад цогцсыг нь олж чадаагүй ч найдлага тасрахгүй далайн ёроолд байж магадгүй хэмээн усан доор эрэл зохион байгуулж байгаа аж. Автобусны жолооч ажилтай тэрээр далайн гүнд хэзээ ч  шумбаж үзээгүй боловч эхнэрийнхээ сүүлчийн хүслийг биелүүлэхээр усан доогуур эрэл хийсээр байна.