Төв Азид Тажикистан-Киргиз-Казахтсан-ОХУ гэсэн чиглэлээр төмөр тавих талаарх хэлэлцүүлэг ахин эрчимтэй явж эхэлсэн тухай “DW” агентлаг мэдээлж байна. Хэлэлцүүлэгт нүсэр төслийн оролцогч болж магадгүй орнууд дахин анхаарал тавихад хүргэсэн гол шалтгаан нь Тажикистан-Киргиз-Казахтсан улсыг Афганистан ба Хятадтай холбох өөр чиглэлээр төмөр зам тавих төсөл болсон аж.
Ингэхдээ төмөр замыг хоёр чиглэлээр тавих санал гарчээ. Нэг нь, Киргизийн нутгийг бүхэлд нь дамжсан төмөр замыг 3,5 мянган метрийн өндөрт байдаг Сарыташ тосгон хүртэл тавиад тэндээсээ хоёр салаалан нэгийг нь Хятад руу, нөгөөхийг нь Узбекистан руу гэж хуваах. Энэ чиглэл нь байгалийн хүнд нөхцөлд тавигдах тул хөрөнгө оруулагчид 10-11 тэрбум ам.доллар гаргах шаардлагатай гэнэ. Нөгөө чиглэл нь, Киргизийн Чуйн ба Талассын хөндийгөөр дайраад Афганистаны Желалабад, Баткений мужаар дамжин Тажикийн Согд муж руу гарснаар хоёр улсыг Казахстан, Оростой холбоно.
Энэ төсөлд оролцож магадгүй улсын дотроос Тажикистаны тээвэр харилцаа хамгийн хүнд байгаа. Улсыг бүхэлд нь тууш холбосон төмөр зам байхгүйн улмаас зарим муж нь гадагшаа гарцгүйн дээр нийт ачаа тээвэрлэлтийн 90 хувийг машинаар гүйцэтгэх болдог нь цаг хугацаа, зардал мөнгө их шаарддаг. Хятадаас Афганистан хүрэх төмөр замыг Тажикистанаар дамжуулан тавьж магадгүй гэж байсан ч 2013 онд энэ замыг Узбекистанаар дамжуулах болсон тухай мэдээ ирсэн.
Иймд Тажикийн хувьд дээр дурдагдсан хоёр хувилбараас гадна Тажик-Афганистан-Туркмен гэсэн шинэ төмөр зам байгуулах ажил эхлүүлэхэд гол найдлага тавиад байгаа аж. Энэ төслийн ТЭЗҮ тооцох зардлыг Азийн хөгжлийн банкнаас гаргахаар болжээ.