Дорнод аймаг дахь Петрочайна дачин тамсаг компанийн нефть олборлолтын 19-р талбайд гал түймэр гарснаас тээврийн машинууд нь шатаж, хүний амь үрэгджээ. Гал түймэр өчигдөр оройн 20 цагийн үед гарч, долоон автомашин шатсан байна. Гал түймрийн дуудлагын дагуу Дорнод аймгийн төвөөс Онцгой байдал, цагдаа, прокурор, мэргэжлийн хяналт, гаалийн байгууллагын мэргэжилтнүүд түймрийн газарт очиж ажилласан байна. Нефть ачсан машинууд дэлбэрэх аюултай байсан тул  хориглолтын бүс тогтоож, гал сөнөөгчид ойртох боломжгүй байсан ч, эцэст нь галыг бүрэн унтраажээ.  Эдгээр тээврийн машиныг барьж байсан 2-3 хятад жолооч нас барсан байж болзошгүй  гэдэг мэдээлэл байна.
Петрочайна дачин тамсаг компани өнгөрсөн сараас нефтиэ тээвэрлэж эхэлсэн. Тэд БНХАУ-д байрлаж буй хүлээн авагч компанийнхаа байрлал, ажлын цаг зэргээс шалтгаалан оройн цагаар тээврээ хийж байжээ.