Лениний музейн асуудлаар МАН болон төрийн хооронд өрнөсөн маргаан эцэслэн шийдвэрлэгдэж, энэ сарын 18-ны өдөр барилгыг ССАЖЯ-ны харьяа Үлэг гүрвэлийн музейд шилжүүлэн өгөхөөр болжээ. Энэ талаар ССАЖЯ-ны хуулийн зөвлөх Т.Энхбаяраас тодрууллаа.

-Лениний музейн асуу­дал эцэслэн шийдэгд­жээ. Байрыг төрийн өмчинд шилжүүлчихлээ. Одоо Үлэг гүрвэлийн музей хэзээ байраа хүлээн авах вэ?
-Улсын Ерөнхий шүүгч МАН-ын гомдлыг хэлэлцээд хөдлөшгүй байна гэсэн хариу өнөөдөр /өчигдөр/ өгсөн байна лээ. Тэгэхээр ерөнхийдөө бүх шатны шүүх ажиллагаа дуусч байна.

-Байраа хүлээж авах товлосон хугацааг заагаа­гүй юм уу?
-МАН хэзээ хүлээлгэж өгнө, тэр үед нь л авна. Шүүхийн бүх шатны шийдвэр гарсан учраас төр өмчөө авах нь ойлгомжтой. Өгөхгүй бол Шүүхийн шийдвэр гүйцэтгэх газраар албадан чөлөөлүүлнэ.

-Лениний музейн үзмэ­рүүдийг ч гэсэн хүлээн ав­сан гэж байсан. Энэ та­лаар...?
-Тэр асуудлыг Улсын мөр­дөн байцаах газар шалгаж байгаа.

-Бүх шатны шүүхээр хэлэлцүүлээд төр өөрийн өмчөө буцаан авахад хэр хугацаа оров оо?
-Өнгөрсөн оны хоёрду­гаар сараас эхлээд л шүүх­дэлцсэн. Жил гаруйн хугацаа зарцуулсан байна.

-Лениний музейгээс өөр, буруу зориулалтаар ашиглаж байгаа урлагийн олон байшин. Цаашид энэ маягаар төрийн өмч байсан байгууламжуудыг буцаан авах уу?
-Бусад барилгын хувьд тухайн үедээ хуулийн дагуу хувьчлагдсан бол хүчээр авах эрх бидэнд байхгүй. Харин Лениний музей бол ямар ч хувьчлалд ороогүй байсан. Түүнээс биш төр хувьчилсан барилгыг буцаан авч байгаа хэрэг биш гэдгийг сайн ойлгох хэрэгтэй.