Сураггүй алга болоод байсан Малайзын агаарын тээврийн Боинг-777-200 онгоцноос хиймэл дагуулууд маш сулхан дохио хүлээн авсан байна. Харамсалтай нь үүгээр онгоцны байгаа газрыг тодорхойлж болох эсэх нь эргэлзээтэй байна. Зарим эх сурвалжийн мэдээгээр бол энэ дохио эрэл хайгуул хийж байгаа бүсээс өөр газраас ирж байгаа ч техникийн мэдээлэл бүрэн өгч чадахгүй байгаа гэнэ.
Үүнээс гадна онгоц радарын дэлгэцнээс алга болсныхоо дараа дөрвөн цаг нисэх боломжтой байдаг гэсэн хувилбарыг америкийн мэргэжилтнүүд дэвшүүлэн авч үзэж байгаа юм байна. АНУ-ын терроризмын эсрэг байгууллагын ажилтнууд үүнийг иш үндэс болгон нисгэгчид юм уу, өөр хэн нэгэн онгоцыг авч үл мэдэгдэх чиглэлд нисэхдээ  радио долгион дамжуулагчийг хаасан байж болох юм гэсэн хувилбарыг судалж байна. Мэргэжилтнүүд бас онгоцны хөдөлгүүр лавтай таван цаг нисэх боломжтой байсан талаар мэдээллээ.