Канадын Торонто хотыг Монреаль ба Оттаватай холбодог төмөр замыг уугуул иргэд буюу индианчууд хааж эсэргүүцэл илэрхийлжээ. Тэд 1960 оноос хойш олноор сураггүй алга болсон индианчуудын хэрэгт мөрдлөг явуулахыг төв Засгийн газраасаа шаардсан байна. Жагсагчид зам хааснаас болж, төмөр замын компани 26 галт тэргээ зогсоож Торонто - Оттава чиглэлийн 5000 орчим зорчигчийг 100 гаруй автобусаар зөөж эхэлжээ.
Канадын индианчуудын амьдардаг нутаг нь газрын тос, шатдаг хийнээс эхлээд битумтай элс хүртэл төрөл бүрийн эрдсээр баялаг. Иймд газрын баялгийг ашиглах гэсэн уул уурхайн компаниуд ба түүнийг эсэргүүцсэн эсвэл нөхөн төлбөр шаардсан индианчуудын хооронд зөрчил их байдаг аж.