Сирийн сөрөг хүчний дайчдад Америк ба Саудын Аравийн тусгай албад танк эсэргүүцэгч пуужин дамжуулж өгсөн тухай “Уолл Стрит Журнал” сонин мэдээлэв. Пуужинг гуравдугаар сарын эхээр Турк ба Иорданы хилээр дамжуулан Сирийн босогчдод нийлүүлсэн. Нийлүүлэхийн өмнө “BGM-71 Tow” танк эсэргүүцэгч пуужингийн систем ашиглах сургалтад босогчдыг хамруулсан байна. Гэхдээ америкчууд Сирийн сөрөг хүчний бүх бүлэглэлд ийм зэвсэг өгсөнгүй. Үйл ажиллагаа нь лалын хэт явцуурлаас ангид, илүү төвийг сахисан үзэл бодолтой гэж үздэг “Харакат Хазм” бүлэглэлийн дайчдад л 20 ширхэг пуужингийн систем өгчээ. Вашингтон дахь Сирийн босогчдын төлөөлөгч танк сөнөөгч пуужин нийлүүлж байгаа нь илүү хүчирхэг, оновчтой сүүлийн үеийн зэвсэг нийлүүлэх боломжийг тодруулах зорилготой туршилтынх гэж онцолжээ. АНУ-ын Ерөнхийлөгч Обама Саудын Арави руу өнгөрсөн сард айлчлах үед дэлхийн зах зээл дээрх газрын тосны үнийг унагах замаар Оросыг хашраасны хариуд Саудчуудын дэмждэг Сирийн босогчдод танк ба агаараас эсэргүүцэн хамгаалах зөөврийн системүүд олноор нийлүүлж, магадгүй тухай яригдаж байсан нь ийнхүү хэрэгжиж эхэлсэн бололтой. Башар Асад танк, нисдэг тэрэг, байлдааны онгоцоор босогчдоос илт давуу гэж босогчид удаа дараалан гомдоллож өрнөдийн ивээн тэтгэгчиддээ хандан танк, онгоцны эсрэг зэвсэг нийлүүлэхийг уриалж байсан юм.