Египетэд үйл ажиллагаа явуулдаг “Ансар Байт аль Макдас” нэртэй алан хядах бүлэглэл “Pepsi” компанид заналхийлсэн тухай “Al-Arabiya” суваг мэдээлэв. Алан хядагчид интернэтээр тараасан мэдэгдэлдээ “Pepsi” компанийг баривчлагдсан лалын хэт явцуу үзэлтнүүдийг зөөвөрлөхөд өөрийн микро автобусуудыг өгч, Египетийн эрх баригчидтай хамтран ажилласан гэж буруутган өс авна гэдгээ мэдэгдсэн байна. Ингэж заналхийлэх болсон бодит шалтгаан нь тодорхойгүй тул шинжээчид гайхав. Тэдний таамаглаж буйгаар алан хядагчид “Pepsi” –ийг “Coca-Cola”-тай андуурсан байх гэнэ.
 “Coca-Cola” компанийн тэмдэг бүхий машинаар баривчлагдсан хүмүүсийг зөөж байгаа зураг Египетийн мэдээллийн хэрэгслээр удаа дараа явуулж байснаас ийм эндүүрэл үүссэн бололтой. Тухайн үедээ эдгээр зураг гарсны дараа  “Coca-Cola” компани яаралтай мэдэгдэл хийж хэрэгтнүүдийг зөөж байсан автобус тэднийх биш, цагдаа нар өнгөлөн далдлалт хийхийн тулд зөвшөөрөлгүйгээр тус компанийн тэмдгийг ашигласан байж болзошгүй гэж мэдэгдэж байсан юм.