Канад айлчилж байгаа Их Британийн хан хүү Чарльз ОХУ-ын Ерөнхийлөгч Владимир Путиныг нацизмыг үндэслэгч Адольф Гитлертэй харьцуулсан байна. Тэрээр энгийн яриан дундуураа Орос болоод Украины харилцаа, Крымын асуудлаар ярьж байгаад “Тухайн үед Гитлерийн хийж байсныг Путин одоо яг хийж байна” гэжээ. Хан хүүг дагалдаж явсан, гитлерийн хоморголон устгалын үеэр төрөл төрөгсдөө алдсан Мэриэнн Фергюсон гэгч Канадын Галифакс дэх цагаачлалын музей үзэж явахдаа Чарльз үнэхээр ингэж хэлсэн гэдгийг  баталжээ.
“Тэр намайг хэзээ Канадад ирсэн бэ гэж асуусан. Би 1939 онд гэхэд тэрээр Тэр цагт Гитлерийн хийж байсан бүхнийг өнөөдөр Путин хийж байна шүү дээ гэсэн юм. Би ч хан хүүтэй санал нэг байна. Та бүхэн харж байгаа биз дээ, Путин яг л Гитлер шиг  бусдын газар нутгийг эзэлж байна шүү дээ. Хан хүү оросын тухайд өөр зүйл яриагүй” гэж Фергюсон ярьжээ.
Харин хан хүү Чарльзын айлчлалын талаарх  хэвлэлийн бага хурал дээр  түүний хувийн ярианы талаар тайлбар өгөхгүй гэсэн байна.