ОХУ-ын Мурманск мужид 19 хүнтэй Ми-8 нисдэг тэрэг сүйрч хоёр хүнийг нь эмнэлэгт хүргэсэн бол 17 хүний нь хувь заяа тодорхойгүй байна гэж ИТАР-ТАСС агентлаг мэдээллээ. Нисдэг тэргэнд багийн таван гишүүн, 14 зорчигч явсан байна.
Багийн гишүүдийн дунд Мурманск мужийн амбан захирагчийн орлогч Сергей Скоморохов, Ойн аж ахуйн газрын дарга Олег Вереникин, “Апатит” компанийн ерөнхий захирал Алексей Григорьев, түүний орлогч Константин Никитин, мужийн Байгаль орчны сайд Алексей Смирнов, Кировын тамгын газрын дарга Андрей Звонирь нарын өндөн албаны хүмүүс байсан гэнэ.

Зарим эх сурвалж тэднийг загасчилахаар явсан гэж байгаа ч зарим нь ОХУ-ын ерөнхийлөгч Владимир Путиныг энэ мужид ажиллаж, амарч зугаалах бэлтгэлийг хангах гэж явсан гэж мэдээлж байна.
Нисдэг тэрэг Дорнод Мунозерийн суурингийн дэргэд осолдсон юм байна. Цаг агаарын тааламжгүй байдал нисдэг тэрэг осолдох шалтгаан болсон байж болох юм гэж байгаа ч үүний зэрэгцээ ийм  нөхцөлд  нисгэгчдийн алдаа байсныг  үгүйсгэхгүй гэж хууль хяналтын байгууллагууд мэдээлжээ.