Америкийн Сиэтл хотын эрх баригчид энэ долоо хоногт нэг цагийн хөдөлмөрийн доод үнэлэмжийг 15 ам.доллар болгож өсгөх тухай хууль баталжээ. Ингэснээр Сиэтл хот нь АНУ-д цагийн хөдөлмөрийг хамгийн өндөр үнэлдэг хот болсон байна. Нэг цагийн ажлыг 15 ам.доллараар үнэлнэ гэдэг Америкийн хөдөлмөрийн хөлсний дундаж хэмжээнээс хоёр дахин давж гарсан үзүүлэлт. Хөдөлмөрийг нь ажилласан цагаар нь үнэлэн цалин өгдөг зоогийн газрын зөөгч, угаагч гэх мэт ажилтан, эмнэлгийн сувилагч асрагч нар үүнд хамгийн их баяртай байгаа аж.
Гэхдээ цагийн хөдөлмөрийн хөлсийг шууд нэмэхгүй. Одоо байгаа цагийн 9.32 ам.доллараас бага багаар нэмсээр салбараас нь хамааран 3-7 жилиийн дотор 15 ам.доллар хүргэнэ.

АНУ-ын хэмжээнд цагийн хөдөлмөрийн доод үнэлэмж 7.25 ам.доллар байдаг. Энэ хэмжээг 2009 онд тогтоосон бөгөөд Америкийн 50 мужийн 39 нь хөдөлмөрийн хөлсний доод хэмжээ гэж мөрдөж эхэлжээ.

Гэхдээ Ерөнхийлөгч Обама нь АНУ-ын хэмжээнд цагийн хөдөлмөрийн доод үнэлэмжийг 10.1 ам.доллар болгохыг уриалан шинэ төлөвлөгөө санал болгоод байгаа юм. Энэ төлөвлөгөөний дагуу 500 ба түүнээс дээш ажилтантай компаниуд цагийн хөдөлмөрийн доод үнэлэмжийг энэ хэмжээнд хүргэхэд долоон жил өгөх аж. Гэхдээ энэ төлөвлөгөөг нь Америкийн парламентын доод танхим Конгресст олонх байгаа Бүгд найрамдах намынхан дэмжихгүй гэж шинжээчид үзэж байна.
Үүнээс өмнө Вашингтон мужийн Сиэтл-Такома нисэх буудлын хажууд байдаг жижигхэн суурин газрын удирдлага иргэдийнхээ цагийн хөлсний хэмжээг 15 ам.доллар болгож байв. Ингэснээр нисэх буудлын үйлчилгээнд ажилладаг тус хотын 6.3 мянган хүн хөдөлмөрийн хөлсний доод хэмжээ хамгийн өндөртэй хүмүүс болж байсан юм.