Сирийн өнөөгийн ерөнхийлөгч Башар Асад тус улсад болж байгаа төрийн тэргүүний сонгуульд нийт сонгогчдын 88,07 хувийн санал аваад байна гэж Сирийн парламентын спикер Мохаммад аль Лахам мэдээлжээ. Ийнхүү Башар Асад энэ сонгуульд үнэмлэхүй ялж, Сирийн ерөнхийлөгч болох нь тодорхой болсон ч албан ёсын дүнг танилцуулаагүй байна. Энэ сонгуульд сирийн 15 сая иргэний 11,5 сая сонгогч саналаа өгөх  ёстойгоос  73,4 хувь нь оролцсон гэжээ.
Сирид Ерөнхийлөгчийн сонгууль сүүлийн 50 жилийн түүхнээ анх удаа болж байгаа юм. Өнөөгийн ерөнхийлөгч Башар Асадтай коммунист Махер Абдель Хафиз Хажар, Засаг захиргааны хөгжлийн сайд асан Хасан илляхи ан-Нури нар өрсөлдсөн юм.
Харин Белгийн нийслэлд уулзалдаж байгаа Их-7-ийн орнуудын тэргүүн нар Башар Асадын энэ үнэмлэхүй ялалтын дүн зохиомол гэж үзэж байна. Тэдний мэдэгдэлд “Бид зургадугаар сарын 3-нд Сирид болсон ерөнхийлөгчийн сонгуулийн дүнг авч үзэж байна. Башар Асадыг байхад Сирид ямар ч ирээдүй байхгүй” гэжээ.