Италийн эргийн хамгаалалтын албаныхан эрэг орчмоос цагаачид болон  30 гаруй цогцос тээсэн загас агнуурын хөлөг олсноо  Хойд Африкаас Сицил рүү зорчиж явсан гэж таамаглаж байгаа юм байна. Италийн тэнгисийн цэргийн хүчний мэдээлснээр аврагчид хөлөг дээр байсан хүмүүс, цогцосуудыг нүүлгэн шилжүүлж гаргахад тэнд төрөх тун дөхсөн хоёр ч жирэмсэн эмэгтэй байжээ. Хөлөг дээр ойролцоогоор 590 дүрвэгч байснаас нэлээд хэдэн хүнд нь эмнэлгийн тусламж хэрэгтэй болсон  гэж Эргийн хамгаалалтын алба  мэдээлжээ. Ер нь өнгөрсөн амралтын өдрүүдэд Италийн тэнгисийн цэргийн Эргийн хамгаалалтын алба тус улсын хилийг хууль бусаар нэвтрэх гэж явсан 1600 орчим хүнийг аварсан байна.
Энэ 2014 он гараад нийтдээ 60 гаруй мянган цагаач иргэн тус улсын өмнөд нутгаар орж ирсэн гэж Италийн Засгийн газар  мэдээлж байна. Энэ байдлаар бол энэ он Италийн хувьд цагаач иргэд орж ирсэн тоогоороо дээд амжилт тогтоож магадгүй байгаа юм. 2011 онд энэ улсад хамгийн их буюу 63 мянган цагаач иргэн орж ирж байсан юм.