АНУ-ын Төрийн департа­мент америк улстөрчдийг хэвлэлийн бага хурал дээр үг хэлэх, конгрессын хуралдаан дээр мэдүүлэг зөв өгөх дадалтай болгох сургалт зохион байгуулахаар болж “AMTIS” компанитай 545 мянган ам.долларын гэрээ байгуулжээ. Гэрээний дагуу Флорида мужид байрладаг “AMTIS” компани нь Төрийн департаментын албан тушаалтнуудад байр сууриа зөв илэрхийлэх, бодлоо ойлгомжтой байдлаар олон нийтэд хүргэдэг болгох цуврал хичээл заах аж. Сүүлийн үед АНУ-ын Төрийн департаментыг Конгресст байр сууриа тодорхой илэрхийлж чаддаггүй гэж удаа дараалан шүүмжилж байгаатай холбоотойгоор ийм сургалт зохион байгуулж байгаа бололтой. Тухайлбал, Төрийн департаментын ажилтнууд буюу Америкийн дипломатчид алан хядлагатай тэмцэх хууль зүйн бодит үндэслэлийг Конгресст тайлбарлаж чадаагүй, 2012 онд Ливийн Бенгази хот дахь Консулын газар руу хийсэн дайралтын дараа авсан арга хэмжээтэй холбоотой ойлгомжтой тайлбар гаргаж чадаагүй гэх мэт шүүмжлэл олон. Төрийн департаментын ажилтнуудад манайхны ярьд­гаар “вакумжуулсан сургалт” явуулж конгрессын гишүүдийн эвгүй асуултуудад хэрхэн хариулах ёстойг заах аж.
Төрийн департаментын байгуулсан энэ гэрээнд жирийн америкчууд шүүмж­лэл­тэй хандаж байгаа тухай “Washington Times”  сонин мэдээлжээ. “Иргэд төрийн үр ашиггүй зардлын эсрэг” хөдөлгөөний төлөөлөгч Лесли Пэйж иймэрхүү үргүй зардал гаргахын оронд Америкийн албан тушаалтнууд хүлээ­сэн үүргээ зохих ёсоор гүйцэтгэхэд л хангалттай  гээд “Тэд микрофоны өмнө суугаад Америкийн ард түмэнд юу хийж байгаагаа тайлбарлахдаа хэлэх ёстой үгээ уншиж, тавьсан асуултад шударгаар, чин сэтгэлээсээ хариулж байхад хангалттай. Конгресст мэдүүлэг өгнө гэдэг Чарли Роузын шоунд оролцохтой адилгүй. Бодитоор болсон зүйлийн талаар л бүгд сонсохыг хүсч байгаа болохоор тэр талаар бүгдийг ярихыг хичээцгээ” гэжээ.