Ардчилсан нам үүсэн байгуулагдсаны 25 жилийн ойн баярын хүндэтгэлийн  хурал Соёлын төв өргөөнд болж байгаа бөгөөд энэ өдөр  Ардчилсан нам ямарч фракцгүй нам болно гэдгээ Ардчилсан намын дарга З.Энхболд мэдэгдлээ.

 Энэхүү түүхт ойн баярын хурлыг нээсэн тэрбээр, “ Нийт гишүүддээ зөвхөн АН гэдэг фракцад нэгдэхийг уриалж байна. Үүнийг Монгол төрийн эрх ашиг шаардаж байгаа. АН төлөвших нь Монгол Улсын эрхэм зорилго” хэмээн  онцлон тэмдэглэв.

Харин тус намын Ерөнхий нарийн бичгийн даргын үүрэг гүйцэтгэгч Л.Эрхэмбаяр “Ардчилсан нам өнгөрсөн хоёр жил засгийн эрх барихдаа Монголд сүүлийн 10 жил хийж амжуулаагүй их ажлыг хэрэгжүүлсэн. Тухайлбал, Улаанбаатарт болон хөдөө орон нутгийг холбосон 2006 км авто зам тавьлаа. Мөн найман хувийн орон сууцны ипотекийн зээлийг хэрэгжүүлсэн, эрчим хүчний эх үүсвэрийг эрс нэмэгдүүлсэн зэрэг амжилттай ажилласан хэмээн онцлов.

Түүний дараа үг хэлсэн Нийслэлийн Ардчилсан намын хорооны дарга, Монгол Улсын баатар Э.Бат-Үүл, Ардчилсан нам ямагт шилэн, ил тод байж ирсэн. Бид 2012 оны УИХ-ын сонгуулиар АН нь цөөнхөд хүртээлтэй болоод буйг олонхид хүртээлтэй болгохоор Эдийн засгийн хувьсгал хийх уриаг дэвшүүлж гарч ирээд ажиллаж байна. Бичил зээл, ЖДҮ-ийг дэмжих зээлийг ард иргэдэд хүртээмжэй болгох алхмуудыг хийсэн. Өнөөдөр 10 айл нэгдээд хашааныхаа газар дээр орон сууц, таун хаус барихыг бид дэмжинэ. Иргэн бүрийг өмч хөрөнгөтэй, орлоготой, ажилтай байлгах нь манай намын зорилт хэмээн онцолж байв.

Хурлын эхэнд “Үүрэг гүйцэтгэгч буй дарга нараа хэзээ жинхлэх вэ, Ардчилсан Намд шинэ эргэлт хийх цаг нь болжээ, Үеэ өнгөрөөсөн Ардчилагчид шинэ үедээ зайгаа тавьж өг” зэрэг лоозон барьсан залуус орж ирж эсэргүүцэл илэрхийлж байгаад хурлын төлөөлөгчдийн шаардлагаар танхимаас гарсан юм. Үүнийг Э.Бат-Үүл, тэд биднийг Ардчилсан нам гэдгийг баталлаа. Баярын хурлын чимэг болохыг нь хорих шаардлагагүй гэв. АН-ын хурал үргэлжилж байна.