УИХ дахь Ардчилсан намын бүлэг өчигдөр хуралдаж, Ерөнхий сайд Ч.Сайханбилэгийн ОХУ-д хийсэн айлчлалын талаар өөрөөс нь мэдээлэл сонсчээ. Харин бүлгийн хуралдаанаар Шийдлийн Засгийн газарт хамтран ажиллаж байгаа МАН-ын асуудлыг хэлэлцэх байсан ч УИХ-ын дарга З.Энхболд орон нутагт ажиллаж байгаатай холбогдуулан хойшлуулжээ.

Гэхдээ мэдээллийн үеэр бүлгийн дарга Б.Гарамгайбаатар МАН-тай хамтарсан Засгийн газар байгуулах гэрээг эргэн харах цаг болсон талаар ярилаа.
Тухайлбал, тэрээр “Бүлгийн гишүүдийн дийлэнх нь МАН-тай байгуулсан хамтарсан Засгийн газар байгуулах гэрээг эргэн харах цаг хугацаа нь болсон гэж үзсэн. МАН Засгийн газарт хамтарч орсноос хойш зөвшилцлийн гэрээний зөвхөн албан тушаалын хуваарилалтыг л бүрэн биелүүлсэн. Харин бусад асуудал дээр зөвшилцлийн шатанд, зарим нь бүр зөвшилцөлд тусгаснаас эсрэг явж байгаа учраас бид нухацтай хэлэлцэж, эцсийн шийдэл гаргах ёстой гэж үзсэн” гэлээ.
Харин бүлгийн дэд дарга Ш.Түвдэндорж “1000 иргэнээс хамтарсан Засгийн газрын талаар санал асуулга асуухад 63 хувь нь хамтрах шаардлагагүй гэж үзсэн байна. Одоогоор эцсийн шийдвэр гараагүй байгаа ч судалгаанд үндэслэн ажиллах ёстой. Мөн манай намын орон нутгийн байгууллагууд МАН-тай хамтарсан Засгийн газар байгуулсанд шүүмжлэлтэй хандаж байгаа” гэсэн юм.