УИХ-ын Төсвийн байнгын хороо өнөөдөр Эдийн засгийн ил тод байдлыг дэмжих тухай хуулийн төслийн эцсийн хэлэлцүүлгийг хийж дэмжив.

Хэлэлцэж буй асуудалтай холбогдуулан УИХ-ын гишүүн С.Дэмбэрэл, “Бид төрийн зүгээс хэрэгжүүлэх нэг удаагийн арга хэмжээг маш сайн ярих ёстой. Харамсалтай нь энэ хуулийг хэлэлцэх эсэх үед нь хэлж байсан саналыг анхны хэлэлцүүлгийн үед нэмж оруулаагүй байна. Тийм учраас энэ хуульд УИХ-ын гишүүд ямар ч “орц” хийсэнгүй. Тухайлбал, татвараа шударгаар төлсөн аж ахуйн нэгжүүдийг урамшуулах заалтын талаар гишүүд олон ярьсан. Сүүлийн гурван жилийн хугацаанд татвараа шударгаар төлж ирсэн аж ахуйн нэгжүүдэд татварын хөнгөлөлт үзүүлэх, татварын хяналт, шалгалтаас гурван жилийн хагцаанд чөлөөлөх зэрэг заалт оруулсан тохиолдолд аж ахуйн нэгжүүдээ дэмжсэн маш том урамшуулал болно. Мөн иргэн, аж ахуйн нэгжүүд гадаад улсад данстай, эсхүл үл хөдлөх хөрөнгөтэй бол тэрнийг нь Монгол Улсын бүртгэлд оруулах заалтыг энэ хуульд оруулах ёстой байсан” гэсэн санал хэлэв.

Төсвийн байнгын хорооны дарга Б.Болор, Таны хэлсэн саналыг өчигдөр буюу энэ сарын 06-нд болсон байнгын хорооны хурлаар хэлэлцсэн гэв. Мөн Хууль зүйн сайд Д.Дорлигжав, С.Дэмбэрэл гишүүний хэлсэн зарим саналыг хуулийн төсөлд тусгасан байгаа хэмээн хариуллаа.

Түүнчлэн УИХ-ын гишүүн Д.Эрдэнбат, Нийгэмд авлигачдыг өршөөх гэж байна гэсэн ойлголт яваад байна. Хуулийн төсөлд тусгасан Авлигын эсрэг хуулийн заалтуудыг тайлбарлаж өгнө үү. Энэ заалтад ямар хүмүүс хамрах вэ хэмээн тодруулсан.

Хууль зүйн сайд Д.Дорлигжав, Авлигын эсрэг хуулиар хөрөнгө орлогын мэдүүлэг өгөх бүх хүн энэ хуульд хамаарна. Эдгээр хүмүүс хөрөнгөө нуусан, татвараас зайлсхийсэн байвал эрүүгийн хариуцлагаас чөлөөлж, захиргааны буюу торгох арга хэмжээ авах юм. Мөн төрийн өндөр албан тушаалтан их хэмжээний хөрөнгө нуусан байвал огцруулна” хэмээн хариуллаа.

Ийнхүү хуулийн төслийг УИХ-ын чуулганы хуралдаанаар хэлэлцүүлж, батлах санал хураалт явуулахад хуралдаанд оролцсон гишүүд 100 хувь дэмжлээ.