Францын хурдны галт тэргэнд АК-47 автомат буугаа зэвсэглэсэн этгээд халдлага үйлдэх гэж байхад нь АНУ-ын жуулчид саатуулсан байна. Амстердам хотоос Парис орох хурдны галт тэргэнд хэрвээ аймшигт халдлага гарсан бол 50-80 гаруй хүн амиа алдах эрсдэлтэй байсан талаар Францын цагдаагийнхан мэдэгдсэн аж. 

АНУ-ын хоёр жуулчин тамхи татаад зорчих хэсэг рүү ортол буутай этгээд цааш харан зогсч зорчигчдыг сүрдүүлж байжээ. Тэд зэвсэгтэй этгээдийг саатуулж Парис хотын цагдаагийн ажилтнуудад хүлээлгэн өгсөн байна. Жуулчид хэрэгтнийг нэгжих үед найман магзин сум, гар буу болон өөр бусад зэвсэг гарчээ. АНУ-ын армийн нэгдүгээр салааны ахлагч Спенсор Стоун, Алек Скарлатос болон АНУ-ын Орегоны армийн гвардын цэрэг Энтони Садлер нар амралтаараа Европ тивээр аялж байгаад ийн олон хүний амийг аварсан аж.

Галт тэрэг 500 гаруй зорчигчтой аялж байжээ. Францын Дотоод хэргийн сайд Бернард Казенэув “Хэрэгтэн Морокко улсын иргэн, 26 настай өмнө нь гэмт хэрэгт холбогдож байсан нэгэн байсан. Испани улсаас түүний мэдээлэл ирсэн. Тэрээр Исламын салан тусгаарлагч Радикал холбооны гишүүн байсан.
Эрэн сурвалжлагдаж байгаад ийнхүү баригдлаа” хэмээжээ. Францын зүгээс АНУ-ын цэргүүдэд “Францын хүндэт одон”-г гардуулсан байна. Мөн АНУ-ын Ерөнхийлөгч тэдний баатарлаг үйлсийг дуулаад эх оронд нь шинэ цол тэмдэг, мөнгөн шагнал хүлээж байгаа талаар өгүүлсэн байна.