Улс төрийн намууд хамтарч “Үндэсний зөвшилцөл” уулзалт хийж, Үндсэн хууль, Сонгуулийн хуулийн асуудал болоод улс төрийн намуудын санхүүжилтийг төрөөс гаргуулах тухай ярилцсан. Тэгвэл уулзалтаар 22 намын төлөөллийг багтаасан ажлын хэсэг байгуулж, өчигдөр хуралдан хэд хэдэн санал гаргажээ. Сонгуулийн тухай хуулийг өөрчлөх цаг хугацаа үлдээгүй учир одоогийн үйлчилж буй хуульд нэмэлт, өөрчлөлт оруулахаар 20 намын нэгээс бусад нь санал нэгдсэн байна.

Үүнээс гадна 2016 оны сонгуульд улс төрийн намууд төрөөс тэрбум хүртэл төгрөгийн санхүүжилт гаргуулах хүсэлтээ хүргүүлсэн гэнэ. Энэ талаар Хамуг Монгол хөдөлмөрийн намын Ерөнхий нарийн бичгийн дарга Б.Одсүрэн “Сонгуульд оролцож ялалт байгуулах нь санхүүжилттэй салшгүй холбоотой. Тиймээс дөрвөн жилд нэг удаа болдог сонгуулийн санхүүжилтийг төр гаргах нь зөв. Ингэснээр нэр дэвшигчид шударгаар өрсөлдөх боломжтой болно” гэлээ.

Төсөв санхүүгийн байдал хүндхэн энэ үед төрөөс ийм хэмжээний мөнгө гаргах нь юу л бол. Тэдний судалснаар боломж бий гэж. Ингээд МАН-ын Ерөнхий нарийн бичгийн дарга Ж.Мөнхбат сонгуулийн хуульд өөрчлөлт оруулах асуудлыг УИХ-ын намрын чуулганы эхний асуудал болгон хэлэлцүүлэх саналыг 19 намын төлөөлөл гарын үсэг зурж дэмжсэнийг хэлэв. Харин санхүүжилтээ төрөөс гаргуулах саналыг үргэлжлүүлэн хэлэлцэнэ гэсэн юм.